قصائد ساخرة - الأكثر قراءة

اللهم إننا صايمين

Hits: 1858

User Rating: 5 / 5

Star ActiveStar ActiveStar ActiveStar ActiveStar Active
 

ما جاش لسه الهلال ولا هل

محدش لسه صام

و إحنا بيشغل بالنا الأكل

و آدان المغرب على كام

و نراجع إيه المخزون

و نخلل فلفل و لمون

ونجيب لوز وزبيب و ياميش

و الآخر كحك و قراقيش

ونسأل مين نجم الفوازير

بعد ماكانوا نيللي و سمير

و ف أنهي قناة تليفزيون

برنامج إربح مليون

وإنهي مسلسل فيها هنتابعه

ومين هي بطلته ومين بطله

و برامج مليانة أغاني

من بعديها برامج تاني

كلها رغي وكاني وماني

وأي كلام ملهوش معاني

أبصر إيه إتجوز مين

و دي عملت عقد لفلمين

و اللي هترقص يوم العيد

جابت بدله موديلها جديد

وبنصرف حسبة ملايين

على فوانيس صنعت ف الصين

و دا برنامج كل على مهلك

إعرف بختك إيه من أكلك

بس ضروري إنك تتسحر

قبل ما تسمع الله أكبر

و إن كان أكل مراتك عاجبك

الناس تتريق على جهلك

عاملالك ع السفره كمين

عشرين صنف سمين ف سمين

عايزاك بقلظ كدا وطخين

مالناش دعوه إنتم حرين

و اللهم إننا صايمين

و تروح بقى على شغلك نايم

مش شغال مقدرش أنا صايم

و إن كانت أستاذه الهانم

هتغير في الفصل معالم

تلاتين يوم يتحول مطبخ

و التلاميذ وياها هتطـبخ

هيقرطفوا للأبله سبانخ

و يا ويله اللي يقول مش طـابخ

لو كان شاطر يبقى بليد

يسقط يعني السنه و يعيد

علشان مطبخش المسكين

اللهم إننا صايمين

 

و إن روحنا نصلي التراويح

تخلص نجري نسابق الريح

فيلم السهره حلو صحيح

بعده هيبقى اليوم خلاويص

و نقول صومنا لرب عزيز

نتسحر و نروح ناويين

اللهم إننا صايمين

و لا نسألش لماذا و هل

و إن كان مسموح و لا حرام

كدا مش نافع لازم حل

دا ما أسموش صيام

 

أكل وشرب صحيح مانعين

و ف الآخر نطلع فاطرين

ولا ينفعنا نكون قايلين

اللهم إننا صايمين

 

0
0
0
s2smodern

Add comment


Security code
Refresh