حاجه بجد تحير .. و خلاص جنني التفكير
من أيام و أنا و لسه صغير .. و لغاية ما صبحت كبير
العالم كله بيتطور .. و إحنا و بس مافيش تغيير
حتى هلال العيد إتصور .. مش واحد من غير تفسير
مابقاش مفتي وحيد بيقرر .. اللي بيفتوا صبحوا كتير
و الحدوته اللي بتتكرر .. نفسي ألاقيلها ف يوم تبرير
بفتح كل كتاب و أدور .. لما زهقت من التدوير
عايز حد لعقلي ينور .. بس سؤالي جوابه عسير
ليـه و إزاي الشهر الواحد .. ممكن يطلع ليه هلالين؟
و إزاي ناس تلاتين يوم صامت .. و ناس تانيين تسعه و عشرين؟
دا التقويم لو كان مش ثابت .. ليلة القدر تكون ليلتين
يا نستناها و تطلع فاتت .. يا تكون لسة هتيجي بعدين
نص أبراج العقل آهي طارت .. و الباقي قريّب ناويين
يعني أصلي العيد و أنا شاكك .. و لا أصوم ويا الصايمين
حد يقولي أهني و أبارك .. و لا أحسن إستنى يومين
و لا يقولي لإمتى كذلك .. أمتنا هتفضل نصين
و كأننا أهلي و زمالك .. و لبعض تملي مخالفين
ليه يا أمتنا إتغير حالك .. يرضي يا عالم بس دا مين
و مادام واحد بس آدانك .. يبقى خلافك جاى منين
ردي قوليلي ليه دا جرالك .. ليه مابقاش يجمعنا الدين
و إزاي راضيه ديار إفتاءك .. يوم العيد يبقاله معادين
لو عيد واحد لم أحبابك .. أحسن ما يقسمنا عيدين
نفسي يا فُرقه تلمي عزالك .. إدعوا معايا و قولوا آمين
لحسن شكلي خلاص هتهور .. و أما أتهور ببقى خطير
بضرب راسي في الحيط و أتعور .. و يا عالم إيه فيّا يصير
أصل بجد دي حاجه تحير .. و خلاص جنني التفكير
