كل يومين نوع إنفلونزا
المعـروف و اللي ماهوش لسه
و نجيب العيب ع الحيوان
و بننسى ضمايرنا الوسخه
نغسل إيدنا بليف و صابون
و بنعصر على روحنا لمون
و الزرع بنرويه بمجاري
علشان يبقى بريحه و لون
ناس من حر الفقر بتفطس
و ناس ف بحور أموالها بتغطس
و علاجه على حساب الدوله
لو واحد فيهم يوم يعطس
فيه ملايين سرايرها حصيره
و دا باشا و فلوسه كتيره
ما تهموش حمى الخنازير
و عربيته موديلها خنزيره
ليّا يومين مناخيري بترشح
غصبن عني بإسمي إترشح
و مين فيكم يعرف حلوف
من غير تزوير ممكن ينجح
خنازير بعد فراخ و بهايم
و حمير و كلاب أنا مش فاهم
دا مافيش داء مالهوش دواء
ليه يا وباء فينا سنين حاكم
ميكروب لف خمس دورات
و جايه السادسه مادمنا سكات
و بعد شارعنا ما كان فيه بس خرابه
بقى كله زباله و خرابات
