صلي معايا ع النبي
و إسمحلِي أقولك مذهبي
إقفل كتب الأحلام
و إسمع حقيقة مكسبي
مش كل من كتب الكلام
صاحب قلم
ولا كل من كانله مقام
يبقى ولي
و أعظم و أصدقها بيان
اللي بدايته البسمله
و لا حاجه بتطهر مكان
زي الصلَّه
و لا فيه حِكايه بِتبتدي
من غير مانقولها (كان)
يرحمها كانت جدتي
ينبوع مليان حنان
منها الحِكايه تِتحكِي
زي الفيلم الألوان
و ف يوم لاقتني بشتِكِي
و شافتني حزين قلقان
جاتلي و قالت خبرتي
بتقول إنك حيران
إسمعها مني كلمتي
و بلاش تفضل زعلان
يا أبني ضعيف الإنسان
بِتهِزُه أصغر مشكله
و إن طال يا إبني الزمان
أيامنا برضه قليِله
و لا حد ممكن ينجح ف إمتحان
ما فهمش فيه و لا مسأله
و ضروري تِتفتَّح بيبان
فِضلِّت سنين مِتقفِلَّه
فأياك تخونها كلمتك
و تملي راجع حسبتك
إوعاك تخونك دمعتك
غير بس و إنت ف وحدتك
و الدنيا لو يوم عاندتك
إضحك عليها بضحكتك
مش راح تشوف غير قسمتك
و لا تمشي غيرها سكتك
صدقني يا ضنايا محال
يوم حد ياكل لقمتك
بس إنت كون زي الرجال
ع الأرض ثابته خطوتك
إفردها يالا سحنتك
و إفهمها حكمة جدتك
متعِيدش همَّك لو خلص
و لا تملا بالك لو فضي
طبل لقلبك لو رقص
و لا تِتعبوش لو هدي
دا العمر كله يدوب نفس
رحله و مسيرها تنقضي
