يا فلان ـ ـ ـ
ياللي عنيك إتعودوا
ع الذل
و رضيت بالهوان
يا فلان ـ ـ ـ
يـاللي إديك إتقيدوا
بإرادتك إنت
مش إرادة السجان
يا فلان
ياللي نسيت الأرض
و ما صنتش أي عهد
و ف دم أخوك تاجرت
و إخترت تكون جبان
يا فلان ـ ـ ـ
ياللي إنت عايش وسطنا
تقاسمنا عيشنا و ملحنا
محسوب علينا مننا
و أتاري مالكش أمان
يا فلان ـ ـ ـ
إخترت غيرنا و بعتنا
و لا عمرك همك قتلنا
و لا كنت ف يوم ندمان
فأن كنت قادر قلنا
لو كنت إنسان زينا
إزاي بتنام عنيك
و إحنا الجراح بتهزنا؟
و إزاي هُنا عليك
و غدرت بينا و خنتنا؟
بينا و بينك ربنا
يا فلان حطيت إديك
ف إدين ملاها دمنا
و نسيت يوم الحساب
كلب و مصاحب كلاب
خـَســـــــــــــــــــــــــــــيـس
يا بايع شبر من وطنك
بالغالي أو رخيص
خـَســـــــــــــــــــــــــــــيـس
الدنيا متاعها فتنك
و بقيت ع العيشة حريص
فاكر هتلاقى خلاصك
طول ما أنت بتحني ف راسك
و تبيع أهلك و ناسك
مش قادر أفسر إحساسك
مبكتش ف مره عيونك؟
ما صحيش ف لحظه ضميرك؟
طب حتى تفكر في مصيرك
دا أحنا اللي يصيبنا يصيبك
و خيانتك مش هتفيدك
هتعيش في الدنيا أجير
و تموت سافل و حقير
و خطاوي الشرفا تدوسك
بينا و بينك ربنا
يا فلان حطيت إديك
ف إدين ملاها دمنا
و نسيت يوم الحساب
كلب و مصاحب كلاب
لكن شبه إنسان
يا فلان
