علشانك قلبي بيتقطع .. كاره أشوف مش عايز أسمع

بكتب إسمك و أنا بتوجع .. و إن جت سيرتك عيني تدمع

و أبقى ف توب أحزان ملفوف

رجعوا قابيل و هابيل و القِصه .. قُدام عينّا بِتتعاد لسه

يبقى إزاي هنعيد الأقصى .. و نصلي الصلوات الخمسه

مع بعضينا صفوف

زي ما أكون قربت أتجنن .. حاسس إني هموت م الخوف

ردي عليّا قوليلي إطمن .. يا فلسطين إعملي معروف

ليل و نهار على طول بتألم .. نفسي أدارى عشان مكسوف

شايفك رايحه طريق بيضلم .. و كتير قلبي علِيكي ملهوف

كل ما أحاول كلمه أتكلم .. ما بترضاش تطاوعني حروف

يعني خلاص ماقاومش و أسلم .. و أضرب بس عليكي كفوف

و لا قوليلي يجوز أتعلم .. إزاي أقدر تاني أشوف

ياه ع النخوه لما بتخدع .. آه من أخ ف أخ بيطمع

آه من نار بإيدينا بتولع .. يا فلسطين فين راح المجدع

و قولي إزاي الأرض هترجع .. لو ما كانتش ما بينا بتجمع

و ليه يا طريق مش عايز توسع .. يا فلسطين حالك بقى يوجع

و بقيت خايف ليكي نودع .. و تصيري طل عليه بنطوف

بيسيل دمك بإيدين إبنك .. يقتل أخوه و بينسى عدوك

كداب مهما يقول بيحبك .. طول ما رصاصه بيضرب قلبك

باين كدا ما أحناش نستاهلك .. و لا نستاهل شبر ف أرضك

يا فلسطين ليكي مين غير ربك .. بعد الكل ما خانوا لعهدك

و لولا إنه ف قرآنه مباركك .. كنت بقيتي تاريخ مأسوف

زي ما أكون قربت أتجنن .. حاسس إني هموت م الخوف

ردي عليّا قوليلي إطمن .. يا فلسطين إعملي معروف