شجب إستنكار و إدانه
صبحم قيمة الإنسان
و رغم إن الحق معانا
و مسيره ف يوم هيبان
خلينا الخوف يملانا
و رضينا إننا ننِتهان
كل الكلمات خِيانه
كل اللي أدان جبان
و أنا حاسس بالإهانه
ببكي و أنا خجلان
ببكي و أنا حزين
ببكي و أنا آسف
آسف يا فلسطين
ببكي على بلد
كان واحد قسموه
و أبكي على ولد
من حضن أبوه خدوه
شوفته إزاى إنفرد
لما الصهايين صابوه
ما رضيش يعيش متهان
ما رضيش يموت كمشان
ما رضيش و إحنا رضينا
يبقى رخيص الإنسان
و أبكي و أنا خجلان
أبكي على أم
شافت ضناها وسط المدبوحين
و أبكي على أخ
شال جثمان أخوه فوق الأيادين
و أبكي على أب
وسط المسجونين
على خال و عم
في خيام اللاجئين
أبكي على إيه
و لا أبكي على مين؟
على بيت إتهدم
و زرع غيط
داسوا عليه بالقدم
و كل ذره من تراب الأرض
و أجراس الكنيسه يوم الحد
و صوت الآدان لَما يحين الفرض
و شجر الزتون اللي إتحرق
و إتنين هواهم إتسرق
عيني على حالهم
لـما الغريب جالهم
رسم الحدود بينهم
عرف البكا عينهم
يقول ليها في يوم جايلك
نهاري و ليلي أشتاقلِك
تهون الدنيا من بعدك
و لا أرضى الغريب يخدك
تقوله حبيبي ما تغيبش
ف عيني الدمع ما نشفش
و بستناك في يوم ترجع
و أنا عايزاك ما تيأسش
ضروري الشمس يوم تطلع
دي لو غابت ما بتموتش
و يفضل إسمي ليك عنوان
و أبقَالك ليوم الدين
دا عرش الظلم مهمن كان
مسيره يزول مع الظالمين
و أبكي و أنا خجلان
أبكي و أنا حزين
أبكي و أنا آسف
آسف يا فلسطين
