بوسها إدين بابا يا أمور
عدلك نص الدستور
يعني خلاص بان المستور
و إن إنت اللي عليك الدور
بوسها إدين بابا دا بيحبك
قبل ما يمشي كتبها بإسمك
و اللي يفيض إديه بقى لإبنك
و لكل مواطن طرطور
بوسها إدين بابا و لا يهمك
و إوعى ف لحظه تعكر دمك
أصله يا عيني غصبن عنك
دا أنت يدوب عبد المأمور
بوسها إدين بابا و خد راحتك
فصلهالك آهو على قدك
ماشيه يا عم معاك من بختك
ملبستش عمرك دمور
بوسها إدين بابا اللي يشوفك
راح يفهم ف التو ظروفك
و إن إنت يا واد من مصروفك
بقى عندك شركات و قصور
بوسها إدين بابا ميت بوسه
آهو نقالك أحلى عروسه
ع الطبطاب جاتلك مخصوصه
و إحنا دفعنا حياتنا مهور
بوسها إدين بابا إنت لوحدك
متخافش محدش هيزاحمك
و أنا عن نفسي ف ديّه مسامحك
كتر خيرك قوي مشكور
