بحبك يا مصر - الأكثر قراءة

حدوتة تحديد النسل

Hits: 164
Star InactiveStar InactiveStar InactiveStar InactiveStar Inactive
 

حدوتة تحديد النسل

لو رجعناها للأصل

لاهي أول مرة تتقال

ولا هىّ من وحي جنابك

من قبلك ياما قالها (جمال)

و(أنور) قالها .. وقالها (مبارك)

 

بس أنت وأبوك مسمعتوش

ولا كلمة من كل كلامهم

وبرضه النسل محددتوش

وجاي تعيد وتزيد في حججهّم

 

وزي العادة سعتك جاي

بتكرر في كلام مغشوش

طب قولي هتقنعنا إزاي

باللي أنت وأبوك معملتوش؟

 

(يعني تلاتاشر أخت .. وأخ

ومخلف أربعة

وأمّا الشعب يخلف .. كُخ

وضد المنفعة؟)

 

 لأ وكمان قال إيه المفتي

اللي على كيفك شغال

بالتحديد جه راخر يفتي

وعنده أربع عيال

 

طبعاً ما أحنا الحيطة المايلة

اللي عليها فشلكوا تجيبوا

وأنتوا تمام وعقولكم هايلة

الجايبين الديب من ديله

 

أيوا إحنا اللي حفرنّا الترعة

وضيعنا عليها ملايين

في الهوا راحت وماهش راجعة

وبقينا كمان مدايّنين

 

إحنا حقوق النيل الضايعة

ومش عارفين هنجيبها منين

وإحنا عيالنا هي البايعة

علشان الكرسي جزيرتين

 

إحنا بنبني مدينة بسور

كل حيطانها وطوبها ديون

وبنبني إستراحات وقصور

تمرح فيها كلاب فرعون

 

قصدي إحنا الفقرا قوي خالص

اللي منشربش ومنكلش

وأديك قلت الشرط الناقص

ف الخلفة خلاص منفكرش

 

يعني عايزنا ف ليل البرد

لما علينا الدنيا تمطر

حتى ماندفاشى ببعض

ولا بخيالنا نروح ونفكر

 

ممنوع يعني نولّع شمعة

ولا نتبادل الأحاسيس

ويبقى أربعنّا بعديه جمعة

وكل أيامكوا تبقى خميس

0
0
0
s2smodern

Add comment


Security code
Refresh