يرضي مين
زينة شبابنا اللي ماتوا مظلومين
ضحكة ولادنا اللي منها محرومين
أغصان غيطانّا اللي داسها الظالمين
و حيطان بيوتنا اللي ليها مشتاقين
يرضي مين
دم غرق كل صورة .. نار بتحرق ف الطفولة
بالجراح ندفع فاتورة .. و برضه نفضل مديونين
يرضي مين
ليه ف وطنا معزولين .. و بطوارئ محكومين
الكلام دا في أنهي دين .. ردوا قولوا يا منصفين
يرضي مين
يوم حداشر تاني شهر .. قمنا ودعناك يا قهر
و إن دفعنا روحنا مهر .. مش هنرجع مقهورين
يرضي مين
يرضي مين يطلع نهار .. ما نلاقيش فيه لينا دار
و نلاقيه طل و دمار .. بيت جيرانا الطيبين
يرضي مين
يرضي مين هجرتنا غصب .. و إحنا مالناش أي ذنب
دا اللي عاش على أرضه صعب .. عنها يبعد خطوتين
يرضي مين
دا أحنا حراس رمل سينا .. و إحنا عيون مصر الأمينة
إحنا بيها و هي بينا .. مهما طالت السنين
يرضي مين
مش هنسكت ع اللي لينا .. حقنا لازم يجينا
و إن ما جاش نقول عصينا .. و يومها نبقى مضربين
يرضي مين
