الدم هيفضل لعنة .. مافيش منها خلاص
غير لما حكم يجمَعنّا .. ع القاتل بالقصاص
أول ما سال فرقنّا .. بقى نار بتحرقنا
غيّر ف أخلاقنا .. و موّت الإحساس
طرطش على هدومنا .. غرقنّا ف همومنا
طار م العيون نومنا .. و إتقطعِت الأنفاس
أصل الدم الحرام .. لعنة ليوم القيام
ع اللي وافقوا بكلام .. و اللي ضربوا الرصاص
و اللعنة شايفينها .. بالعين و حاسينها
ما تقولوا إيه غيرها .. بدّل قلوب الناس
بسببها نهار و ليل .. عايشين ف عذاب و ويل
الحال عمال يميل .. و الكل علينا داس
و كل ما نمشي ف طريق .. نلاقيه عمال يضيق
بنمون موت بالبطئ .. ف بلدنا و برا رخاص
لعنة بتشعّل حرايق ... و تغرق بيها الزوارق
و شباب ع الموت يسابق .. عواجيز ماسية بعكاز
لعنة ف أكل و غلا .. و ف العلاج و الدوا
منها المريض إتكوا .. و إفترسه المرض إفتراس
بتبور بيها المزارع .. و يقف مكن المصانع
حتى الجنيه ما بقاش نافع .. غير نعمله قرطاس
فقر و فشل و ديون .. قهر و ذل و سجون
يا مفرعنين فرعون .. دوقوا مرار الكاس
