أمه قالتله إنجغة إنجغة .. أي جزيرة تشوفها تبيعها
و قالتله يا كوتوموتو يا قطة .. كل حقوق لينا تضيّعها
أمه قالتله و جدو و ستو .. يا ختي كميلة يا ناس يا حلاوته
دا مفكرها حضانة سعادته .. أو شقة طنط بمنافعها
أمه قالتله هم المم .. كل يا عين أمك و أشرب دم
و إن حد يخالفك يتلّم .. ف سجون ما تعدش زنازينها
أم قالتله حبيبي يا سوسو .. أي كفيل ييجي عندك بوسُه
و بعد ما تاخد منه فلوسُه .. في بنوك برا قوام خزّنها
أمه قالتله يا عيني يا كوكو .. مخك طاير ضاربة سلوكه
و رؤساء العالم و ملوكه .. عارفين إنك جيت تخربها
أمه قالتله و قالها وااااء .. الكدب دا سِيد الأخلاق
و خيانتك دي طبيعة و داء .. إوعى يكون فيه عندك غيرها
أمه قالتله يا كبدي يا لولو .. بكرة عليك أهبل هيقولوا
و اللي موافقك شعب ديوله .. كل يومين بيزوّد طولها
و إنجغة إنجغة يا حيلتها
