(شحات و مد إيديه) .. ما تبخلوش عليه
و كل يوم الصبح .. تكرمشولوا جنيه
و هو أكيد هيدعيلكوا .. يزود ربنا هبلكوا
و هيعين خصوصي وزير .. بيفهم ف الشحاتة خبير
على وزارته بخط كبير .. يكون كاتب دعاوي كتير
هنيالك يا فاعل خير .. و يسترها عليك يا أمير
ما يقدرش عليك ظالم .. و من عين الحسود سالم
و حرصاً منه ع الخدمات .. و سرعة فحصه للطلبات
هتبقى وزارته ليها إدارات .. و كل إدارة بإختصاصات
إدارة هتدعي للستات .. ميتحوجوش للباروكات
و مهما العمر بيهم فات .. تملي يفضلوا موزات
و لا يبتليوا يوم بميزان .. يقول ليهم بقيتوا تخان
و حرصاً منه على عاطلين .. شباب أعدادها بالملايين
هيتيعين ييجي ألفين .. يكون دورهم يقولوا آمين
و في إدارة لكل عريس .. هتدعيله في كل خميس
ما يبقاش من المواكيس .. و لا يحتاج حبوب تركيز
ييسر ربنا حاله .. و تحبل زوجته بعياله
و للي لسة عقباله .. يلاقي شريكته جاياله
و آخر حاجة يا سامعين .. فيه برضه إدارة للفاشلين
على بابها هناك كاتبين .. يارب تكتر الخايبين
ماهو جدودنا زمان قالوا
دا رزق الهبل ع المجانين
