قرررررب قرررررب خدلك فكرة .. مش هتلاقي العرض دا بكرة
قرب خد صورتين للذكرى .. و إتبرع بيهم للشهرة
مش لازم تشتري على فكرة .. و مافيش رسم دخول و لا أجرة
العرض اللي عليك معروض .. زيه إتنين مابقاش موجود
حاجة أحسن م المش أبو دود .. بس عشان عين أي حسود
داهنين وشه بصبغة يود .. فاللي يبان السحنة العكرة
بيقولك ما أحلفش و يحلف .. و بيوعد و تملي بيخلف
و أنا مكدبش عليك حاجة تكسف .. فإن كنت هتشتري خده يكشف
في جنينة الحيوان فيه مشرف .. مش محتاجله طابور و لا نمرة
العرض بتاعنا بفلاتر .. خلفي أمامي من نوع فاخر
و ليه كاتالوج كاتبينه أكابر .. على مهلك تقراه و تذاكر
و إياك تنسى و خليك فاكر .. كل ما يعطل ترجع تقرا
العرض بتقسيط أو كاش .. و لو ما معاكش خده ببلاش
ما هو أصل المعروض بكاش .. متصنف ضمن الأوباش
و حياته معاك ما أضمنهاش .. دِي تقديرها لرب القـُدرة
المعروض بيقول ضربوه .. كام عيل و كتير شتموه
فياريت براحة تعاملوه .. أصل ف ليبيا كان في أخوه
الأحرار في ماسورة لاقوه .. قاعد بيسلك في المجرا
العرض معاه ساعة و سيف .. حاجة معتبرة صنف نضيف
و هتاخد مروحة للصيف .. مع كيلو قهوة عشان الكيف
و ممكن تاخده بدون تكاليف .. بس بداله تجيبلنا قِـدرة
