و إنت بإيدك نار بتقيد .. و تدنس ثورتنا الطاهرة
و أما بتقطـَّع سكة حديد .. و توقف لشوارع سايرة
متقوليش الشعب يريد .. و لا تتكلم بسم الثورة
أنا م الشعب آهو مش رايد .. للبلطجة و العنف أنا رافض
مش أنا وحدي ده زيي كتير .. عايزين مصر نشوفها بخير
فأنت إن كنت شايفنا عبيد .. و إنتوا و بس الطبقة الحرة
متقوليش الشعب يريد .. و لا تتكلم بسم الثورة
أنا م الشعب آهو و بقول .. تهتف بإسمي مش مقبول
أنا م الشعب اللي مبيريدش .. و إنت حاسبني معاك بالغش
مع إني ما عمريش مضيت .. علشانك توكيل بالمرة
متقوليش الشعب يريد .. و لا تتكلم بسم الثورة
أنا م الشعب بقلبي عارفهم .. شرفاء الثورة و حاببهم
مافيش واحد حرق منهم .. و لا رضيوا بفلول بينهم
أما أنت .. بتحرق و رضيت .. تبقى شريك شياطين ف مؤامرة
متقوليش الشعب يريد .. و لا تتكلم بسم الثورة
أنا م الشعب وقفت طابور .. ساعة و إتنين و فضلت صبور
علشان صوتي إديه بإرادتي .. فأنت إزاي جايلي دلوقـتي
تطلب مني الثورة أعيد .. و أسمع صوت تامر من غمرة
متقوليش الشعب يريد .. و لا تتكلم بسم الثورة
أنا م الشعب و مش من رأيك .. و إنت كمان رأيك من حقك
قوله ياريت من غير تخريب .. متكسرش ف بلدك عيب
متخليش الدم يزيد .. و خد من ليبيا و سوريا العبرة
متقوليش الشعب يريد .. و لا تتكلم بسم الثورة
أنا م الشعب لكن مش سامح .. تتعطل أشغال و مصالح
إيه ذنبه مواطن غلبان .. ميحسش ف طريق بأمان
و إنت عشان مش لاقي تأييد .. مش هاماك أوجاعه المـُرة
متقوليش الشعب يريد .. و لا تتكلم بسم الثورة
