إمتى هنمسح دموع
ف عيون أم الشهيد
و قلبها الموجوع
يرتاح من التنهيد
أم الشهيد ياما بكت
لفراقه و إتشوقت
ضناها بعد غياب
يرجع يدق الباب
بصوته يناديها
و تشوفه بعنيها
قودامها رايح جاي
كأنه لسه حي
يتشد بيه حيلها
و يهون معاه ويلها
و إن طال ف يوم ليلها
يبقالها ضي شموع
مين اللي هيجيبلها
حق الشهيد إبنها
ده اللي إتحرم زيها
هيحس شوق حضنها
لإبنها الغايب
اللي بدماه كاتب
حرية ف الميدان
و كرامة للإنسان
و دار و لقمة عيش
و بعدل كله يعيش
من بعد فقر و جوع
حق الشهيد حقنا
و دمه اللي سال دمنا
ده أحنا الميدان ضمنا
و حضنا إيد بعضنا
كسرنا قيد و جدار
خلينا الليل نهار
ياأم الشهيد ثوار
هنكمل المشوار
لغاية ما تنوليه
حق إبنك اللي بيه
بقى لينا صوت مسموع
