إفتكر قسوة قيودك قبل منهم
و إفتكر لحظة ذهولك يوم وداعهم
و إوعى تنسى أو تخونهم
اللي ضحوا عشان حقوقك يوم تنولهم
و إنت رايح تدي صوتك
إفتكرهم
إفتكر أم الشهيد
و الفراق مُره و قساوته
إفتكر إبنه الوليد
لما بس يشوفها صورته
و إفتكر لو هل عيد
إيه يكون إحساس حبيبته
إعتبرهم أهل بيتك
و بإيديك إمسح دموعهم
و إنت رايح تدي صوتك
إفتكرهم
لو مشيت جنب الميدان
إفتكـِر أيامنا فيه
كنا حالفين مهما كان
الوطن تاني نلاقيه
و النهارده جه الأوان
يبقى لينا و نبقى ليه
و بعد مني و بعد منك
يبقى لولادنا و جيلهم
و إنت رايح تدي صوتك
إفتكرهم
و إنت بتعلم بقلمك
إفتكر ذل السنين
إفتكر ألمي و ألمك
لما كنا مقهورين
و اللي جاب حقي و حقك
شُهدا صبحوا و مجروحين
و آن أوان دوري و دورك
شئ بسيط هنردهولهم
و إنت رايح تدي صوتك
إفتكرهم
