كان نفسي أخليكي عروسه
و بإيدي ألبسك الطرحه
حقك على راسي يا محروسه
ردي عليا قوليلي مسامحه
غصبن عني ما كانش بيدي
إتأخرت عليكي يا بلدي
و أما ف يوم قررت أجيلك
الموت حاشني و منك خدني
كان نفسي أحقق أحلامك
و أبدأ أداوي بإيدي آلامك
إنما ما لحقتش يا حبيبتي
و لاقيت روحي بضيع قودامك
ياللي فراقك كان على عيني
عايزك دايماً تفتكريني
و إن سألوكي تقولي حبيبي
و ف حضن ترابك خدتيني
راضي إن أنا يا حبيبتي ف حضنك
غمضت عيوني و أنا شايفك
قربتي تنولي الحريه
و شايف بكره منور جايلك
