الشعب لو قال كلمته
م الصعب حد يسكته
الشعب هو شريان الوطن
هو اللي بيدير المكن
هو اللي عرقان ف الغيطان
هو المكان .. هـو الـزمـن
الشعب هو الأمن
و الشعب هو الأمان
الشعب هو النيل
و الشعب هو البحر
الشعب هو الليل
و الشعب هو الفجر
الشعب هو الدنيا
و الشعب هو الدين
و الشعب كان تايه سنين
و خلاص لاقاها سكته
الشعب لو قال كلمته
م الصعب حد يسكته
الشعب لو بدأ الكلام
الكل لازم يسمعه
الشعب لو حس بألام
كل الشجر
كل النخيل
كل الحيطان
كل البيوت
كل الشوارع و الحارات
لازم معاه يتوجعوا
و الشعب عارف اللي ضده
و إيه اللي ممكن ينفعه
و الشعب هو و بس وحده
يقدر يقوم من محنته
الشعب لو قال كلمته
م الصعب حد يسكته
الشعب كان دايماً برئ
و بظلم حاكمه بيقتله
الشعب كان ضل الطريق
و لَقاله ضوء هيوصله
الشعب هو اللي ف يناير
ما بقاش يحس بخوف
بإرادته كسَّر الأوامر
و مافيش ف الحق كسوف
الشعب هو كل ست
و كل راجل
الشعب مش بس الأكابر
و لا بس أصحاب المراكز
الشعب عيله بتنام ع الحصيره
الشعب هو البنت اللي بضفيره
و هو تلاميذ المدارس
الشعب هو صاحب القرار
هو النهار
الشعب هو الجنه
و الشعب هو النار
الشعب هو الحرب
و الشعب هو السلام
و الشعب يريد إسقاط النظام
