هم يدوب كام يوم و أرجعلك .. و أبوس طينة أرضك
كام يوم بس و أقولها بحبك .. وأنا يا حبيبتي ف قربك
كام يوم و أشرب مية نيلك .. و أشوف عظمة هرمك
و عشان عارف إني هجيلك .. و هتخديني ف حضنك
عيني خاصمها النوم
و هم يدوب كام يوم
هم يدوب كام يوم يا حببتي .. لسه حاسبهم جوا نتيجتي
بعديهم هوصل بسفينتي .. لشطوطك و أرتاح من حيرتي
دا أنا لو قادر أجيلك عوم
و هم يدوب كام يوم
هانت قوي يا حبيبتي يا غاليه .. يا أجمل أرض يا أم الدنيا
يا سنين فاتت و سنين جايه .. هفضل ليكي و تفضلي ليّا
من غير أي عتاب أو لوم
و هم يدوب كام يوم
هم يدوب كام يوم بحسبهم .. مره أطرحهم مره إقسِمهم
نفسي قوام أوصل لآخرهم .. و أشوف ناس من قلبي حاببهم
و أنسى جراح و هموم
و هم يدوب كام يوم
هم يدوب كام يوم هيعدوا .. و الطير يرجع تاني لأرضه
بعد سنين ف الغربه لوحده .. و دموع عينه بتجرح خده
و منك كان محروم
و هم يدوب كام يوم
هم يدوب كام يوم و تبان .. شمسك و تدفي البردان
و ألاقيني واخدك بالأحضان .. مصر يا بلدي يا أغلى مكان
إنت ف كوم و الدنيا ف كوم
و هم يدوب كام يوم
