أنا راجع مصر قريب
للشعب الغالي الطيب
على شط النيل هتمشى
و أتفسح و أركب مركب
أنا راجع ليها بإذن الله
لهواها اللي بيوهبني حياه
لقمرها اللي بيسحرني ضياه
و حبيبي اللي أنا بأتمنى لقاه
أنا راجع تاني لأحضانها
من بعد ما غبت كتير عنها
ف القلب حكايه هكملها
مصر ف بدايتها و نهايتها
أنا راجع ليها ماليش غيرها
و لا أقدر أنكر يوم خيرها
و إن كنت ساعات بزعل منها
إنما مقدرش أزعلها
أنا راجع ليها و هحكيلها
عن مر الغربه و طول ليلها
و إزاي أنا كنت بحنيلها
و بكل الخير كنت أدعيلها
أنا راجع تاني لحضن أمي
للحب اللي بيجري ف دمي
و هزور بيت خالي و بيت عمي
و أرتاح و أنا بينهم من همي
أنا راجع تاني لحتتنا
للناس الفاكرين عشرتنا
و نويت لما أوصل لحارتنا
أحضنها و أبوسها حيطان بيتنا
