شوية رومانسي - الأكثر قراءة

خلاص

الزيارات: 1060
تعطيل النجومتعطيل النجومتعطيل النجومتعطيل النجومتعطيل النجوم
 

خلاص بينا مافيش تاني

كلام وردي

هبيعك مهما مين جاني

و ده آخر قرار عندي

لا أفكر فيك ولا إنت

تحاولي تجيبي يوم سيرتي

قسيتي عليّا و ظلمتي

و كل الحلو مررتي

و بعد ما كنت نورتي

ليالي حياتي ضلمتي

لوحدك دوبتي وعشقتي

براحتك برضه لو بعتي

لكِّن إزاي كدا قدرتي

قصاد الناس ملاك بنتي

كأنك صح وصدْقتي

و لا كدبتيش ونافقتي

كلامك عني غيرتي

و رأيك فيّا بدلتي

جرحتيني وشخبطتي

بلون باهت على صورتي

مسحتي الأصل ورسمتي

حاجات ما تليقش بطبيعتي

لكنك مهما شوهتي

ملامحي وغيرها بينتي

هكون ف بدايتي ونهايتي

بدون تزييف ـ ـ ـ على حقيقتي

و أسامحك حتى لو قلتي

بقيتي مش مآمنالي

و من حبي الكبير خوفتي

خلاص بينا مافيش تاني

كلام وردي

هبيعك مهما مين جاني

و ده آخر قرار عندي

 

ياريتني يوميها ما سألتك

ياريتني ما قلت محتاجلك

ياريت الرفض كان ردِّك

و لا ف إيدي لاقيت يدِّك

ياريتني فهمت إيه قصدك

و كنت عرفت إيه غرضِّك

داريتي يوميها ليه شرطك؟

ما وضحتيش ليه هدفك؟

ما جاش على بالي غير إنك

محدش ف الوجود زيك

وكل كلامي كان عنك

بإن إتنين مافيش منك

لكن معـلش من فضلك

تعالي شويه على نفسك

عيديها حكايتي وحكايتك

وإقري فصولها على مهلك

جرحتك إمتى ف كرامتك؟

وإمتى بسببي سال دمعك؟

غلطت برفضي لإهانتك؟

و إني رفضت أكون عبـدك؟

أقولك إيه؟ ـ ـ على راحتك

وقولي زي ما ف بدك

مانيش مملوك ف مملكتِك

هدوس ع الشوك و أسيب وردك

و مهما يكون أنا مسامحك

وعمري ما هاجي و أعاتبك

عشان طبعي ماهوش طبعك

وقلبي حقيقي غير قلبك

وراضي تكون ظالماني

وقابل إنك إرتحتي

ما دُمت طلعتي عارفاني

ورأيك عني صرحتي

(بقيتي مش مآمنالي

و من حبي الكبير خوفتي)

خلاص بينا مافيش تاني

كلام وردي

هبِيعك مهما مين جاني

و ده آخر قرار عندي

0
0
0
s2smodern