النهارده فات وعدى
غصب عني و غصب عنك
فات كأنه لحظه واحده
دقت فيها طعم حبك
فات و ما لحقتِش أقولك
قد إيه لسه بحبك
و إني عشت سنين ف بعدك
كل أملي ف يوم أقابلك
أبقى جنبك
أبقى قادر إني أسمع
دق قلبك
و إن عـينك لو تدمع
أحمي خدِّك
كان منايا ألقاني قادِّر
ياحبيبتي ف حضني أخدِّك
أبقى حاسس إني كلي
ليكي وحدِّك
يبقى ضلك هو ضلي
ياللي غيرك مش فاضلي
صدقيني كان تملي
فيه ف قلبي شئ يقولي
مستحيل حبي تملِّي
و إن صعب ف يوم يكونلي
حد غيرك مهما مالِّي
و لا مهما إيه حصلِّي
و الظروف كانت معاندَّه
أو طريقي جابني .. ودى
أو خدتني الدنيا منك
و النهارده
النهارده فات وعدى
غصب عني وغصب عنك
النهارده لما شفتك
شفتني ف خطوط ملامحك
بين جراحك
وسط فرحك
يوم ما كان الكون براحك
و أما ضاقت يوم مطارحك
يوم ما لفت عتمه ليلك
و أما هلت شمس صبحك
شفتني ف نظرة عيونك
بين شفايفك
فوق خدودك
بين خيوط نسجت ف توبك
ف اللي مكتوب فوق جبينك
ف اللي ساكن بين حدودك
و اللي راح منك لغيرك
شفتني عاشق قيودك
و إني راضي أكون أسيرك
شفتني عقلك
جنونك
ف اللي ظاهر
و ف ضميرك
ف المُؤكَّد
و ف ظنونِّك
ف إبتسامتِّك
و ف دموعِّك
وقت ضعفِّك
و ف صمودِّك
يعني أنا بأبقى ف وجودِّك
و صعـب أكون من غير ماكُونِّك
صدقيني إن قلت حتى
إن صوتك هو صوتي
و ثانيه واحده تكوني ساكته
سهل أعلن فيها موتي
فأوعديني لجل مارضى
تدفنيني جوه ننك
و النهارده
النهارده فات وعدى
غصب عني و غصب عنك
النهارده مره تاني
دق قلبي الأولاني
كنت حاسس و إنت جنبي
إني ف بداية زماني
بان عليّا المِستخبي
و إنك إنت حدود كياني
إنت بس المالكه قلبي
و إن أنا ف بعدِّك بعاني
و إني مهما حاولت أخبي
ما يطاوعنيشي لساني
مره أقول الذنب ذنبي
و إني يومها كنت جاني
لما ضيعتك ياحبي
و إنت قلبك أخضراني
يوم ما وحدي مشيته دربي
و روحت دنيا مش عشاني
مره تانيه أقول دا إنت
اللي قلبك كان أناني
إشتريتك وإنت بعـت
و إبتدا بسببك هواني
تهت منك و إنت تهت
صار مكانك غير مكاني
و إبتديت أحسب نهايتي
و أنتظر لحظة أواني
و أما شفتك ليّا عُدتي
و أما طيفك تاني جاني
قلت هي دي بدايتي
و لو معاكي أعيش ثواني
هقدر أكتبها حكايتي
و أقدر أوصل للأماني
دا أنت بس إن كلمه قلت
تبقى أجمل الأغاني
و ألقى أفراحي و سعادتي
لما ما أخلفهوش ظنك
لما ما تحسيش بوحده
أو بسببي يبقى شجنك
و النهارده
النهارده فات وعدى
غصب عني و غصب عنك
فات كأنه لحظه واحده
دقت فيها طعم حبك
فات و ما لحقتش أقولك
قد إيه لسه بحبك
