شوية رومانسي - الأكثر قراءة

إعتراف *إلى زوجتي الحبيبة*

الزيارات: 88
تعطيل النجومتعطيل النجومتعطيل النجومتعطيل النجومتعطيل النجوم
 

أعترف إني كدبت

لما سألتيني وجاوبت

أيوا أنا قلت إن أنا ف البيت

بس أنا بصراحة غشيت

وأما ضميري لاقيته أنبني

قلت أقولك واللي ينوبني .. ينوبني

أيوا أنا كنت لما سألتي

جوا مكان

حتى أنا قاعد فيه دلوقتي

هوصفه على قد الإمكان

بصي ياستي

هو مكان ف عمارة كبيرة

تشبه خالص قوي عمارتنا

لأ وكمان فيه نفس الجيرة

ودخلته بمفتاح شقتنا

حاجة بجد تصيب بالحيرة

دا أنا فكرته هو دا بيتنا

فاضل أقولك حاجة خطيرة

دا كمان مترتب على ذوقنا

شايف فيه نفس التلاجة

وهي تمام ترابيزة السفرة

نفس المنظر م البلكونة

حتي الباب فيه نفس الأكرة

حتى كمان ماتشات الكورة

في نفس الشاشة بتيجي على فكرة

 مكدبش عليك أتخضيت

وبقيت زي ما أكون مهووس

غمضت عينيا .. وسميت

وفضلت ألعن في الشيطان وأعوذ

أصل أنا لدقايق شكيت

وقلت تكونش ياواد ملبوس؟

طلع الموضوع إني بقيت

في بحور وحدة غريقة بغوص

وأهو من غيرك كلمة بيت

معناها مابقاش بيجوز

أصل البيت مش طوب وحيطان

ولا كام كنبة وطقم جلوس

البيت ياحبيبتي إنسان

البيت بيكي كيان محسوس

 البيت أحاسيس مبنشترهاش

ولا تتقدر يوم بفلوس

البيت أوقاتنا الحلوة اللي بتتعاش

وراضية تكون النفوس

البيت ف وجودك بيكون

مليان بحنان ومودة

إنما وأنا وحدي بكون مسجون

زهقان من الوقفة و م القعدة

البيت ف وجودك زي جنينة كبيرة

وأنت لوحدك بس الوردة

بيكون مملكة وأنت أميرة

ومحدش زيك وأتحدى

ف غيابك عني ماليش سيرة

غير إمتى هلاقي اليوم عدا

بصراحة بجد وحشتيني

وبايني خلاص كدا مش ههدا

غير لما ألاقيك جيتيني

ويصير تاني بينا مناهدة

ترجعي بسؤالك تغيظيني

بكرة أعملك إيه تتغدا؟

بين رايحة وجاية تراقبيني

وألاقيكي واقفالي على الواحدة

قرارات وأوامر تديني

ومش من حقي نقاش ومعارضة

إغسل إيدك .. سرح شعرك

ألبس حاجة مقاسها يناسبك

أخرج بس متتأخرش

إياك طلباتي متجيبش

غير بقى رايح فين .. جي منين؟

في التلفون بتكلم مين؟

وأنا زي التلميذ الشاطر

أبدأ أرد عليك وأجاوبك

وعشان بقى مغلطش وأخاطر

أول كلمة أقولها بحبك

وإن مافيش غيرك ع الخاطر

وإن أنا عايش بس بحُبك

يالا تعالي قوام مش قادر

دا اليوم مبيمشيش ف بُعدك

مش معقول أفضل كدا حاير

علشان بعيوني مش شايفك

بندهلك بالصوت العالي

ونفسي ندايا يوصل عندك

يالا ياروح القلب تعالي

متشوق ليكي ومحتاجلك

وإن كان بقى مش همك حالي

فأنا من تاني أديني بقولك

البيت من غيرك بقى خالي

ومحتاج قوي تمليه بمشاعرك

وكل ماصورتك تيجي ف بالي

ألقى البيت ودفاه ف ملامحك

البيت من غيرك ياحبيبتي

صعب عشاني يكون البيت

البيت من غيرك أنت

بيكون زي ما أكون في لوكاندة

ومجرد عنوان ع الحيط

0
0
0
s2smodern