حوا حبيبتي - الأكثر قراءة

وسط حراسة

الزيارات: 951
تعطيل النجومتعطيل النجومتعطيل النجومتعطيل النجومتعطيل النجوم
 

بعد أن هددتني تليفونياً بأنها ستلجأ إلى دادي اللي هو والدها - لكي يقتص لها مني وجدتها فجأه و بدون مقدمات باعتالي كلام بتقولي فيه ياريس بس أنا مقدرش أقول كان إيه قصدها من كدا يعني كان قصدها  تجر ناعم لما تقولي ياريس؟ ولا كان قصدها تتريق عليا؟ المهم إن أنا بصراحه كلمة ريس دي - قبل مايتخلع - خضتني قوي لكن برضه رديت عليها


بكتبلك وأنا وسط حراسه

أصل كلامك كله سياسه

كنت الأول ماشيه كويس

إيه كان جابها سيرة الريس؟

هيودينا ف داهيه لسانك

هيضيعنا ياحوا جنانك

بس أقولك إيه ماهو عادي

دايماً ترمي كلام ع الفاضي

و نلاقي روحنا ف سين و ف جيم

وكل جريمه وراهـا حريم

هيكون ردي إن سأل القاضي

ودقني آهي لو نفعك دادي

إلا الريس - عايز أعيش

أرجوك تاني ما تطلبنيش

من دلوقتي معرفكيش

و لو بصراحه ما بـطلتِيش

راح أغير رقم التليفون

أنا مش أهبل ولا مجنون

و عمري خلاص ما بقاش مضمون

وممكن قوي أنا وإنت نكون

من غير مستقبل ولا ماضي

دقني آهي لو نفعك دادي

مالك بس وماله ياستي

مش أحسن لو كنت سكتي؟

و لا ياريته إتقَطع الخط

قولي هنعمل إيه دلوقت؟

ولا بلاش .. إياكي تقولي

أنا هحسبها لوحدي بطولي

و مبقاش راجل لو قررت

أسمع مره لرأي الست

و إن فضلت للصبح تهاتي

ودقني آهي لو نفعك دادي


كنا ف حالنا وجنب الحيط

جاتلنا حوا برأي عبيط

أول ماقريته إتخضيت

جه على بالي قابيل و هابيل

كانوا أول قاتل وقتيل

وأنا وإنتم طبعاً عارفين

مين غيرها يفرق أخين

يزرع كره مابين صاحبين

دي بتفرح وتطير يا أخواتي

لو ولع بسببها النادي

ودقني آهي لو نفعك دادي


عندك عقل؟ .. خلاص شاوريه

بس أنا إسمي .. ياريت تنسيه

لو سألوكي .. بلاش تقوليه

والمـوضوع بينكم صفيه

ويالا سيبيني قـوام فُريره

وأنا برضه هسيبِك فرافيرو

دا أنا لو عندي رغبه أخيره

أو حلم مافيش واحد غيره

كنت أركب أول نفـاسه

دا أنا بكتبلك وسط حراسه

أصل كلامك كله سياسه

كنت الأول ماشيه كويس

إيه كان جابها سيرة الريس؟

ضلمتيها الدنيا قصادي

ودقني آهي لو نفعك دادي

يعلن الموقع عدم مسئوليته عن محتوى هذه القصيده

ويسعى الموقع من خلال هذا الإعلان إلى التعبير عن شديد إحترامه للمرأه وإعترافه بأهمية مكانتها

والموقع ينشر القصيده لإيمانه بحرية الرأي وعلى الشاعر أن يتحمل نتيجة مثل هذه الشطحات الشديدة الخطوره

0
0
0
s2smodern