حوا حبيبتي - الأكثر قراءة

تقرير مدسوس

الزيارات: 759
تعطيل النجومتعطيل النجومتعطيل النجومتعطيل النجومتعطيل النجوم
 

بعض النسوه إجتمعن في أحد المنتديات ونشرن تقريراً يتهمن فيه الرجاله الغلبانين بأنهم يجورون على حق المرأه ووصفوها ـ أي المرأه ـ بأنها كالملاك وإن الرجاله دول وحشين قوي بقى  وحاجات كيده فأنا عشان دمي حامي ماأستحملتش

فيه تقرير مدسوس

م الستات السوس

إتفقوا ومخصوص

لموا عشانه فلوس

وأنا وإن راحت روس

عمري مَقول دا يجوز

ومهما الست تحاول

كل محاوله تبوظ

وإن كتبت ف رسايل

أو عملت أراجوز

برضُه الراجل راجل

وإن كان حتى عجوز

وهىَّ الضلع المايل

والبخت المنحوس

لون الحيطه الزايل

والبيت المنكوس

متبطلش عمايل

علشان تلقى الجوز

من غيرُه بتتخايل

ولوحديها تلوص

دا الراجل شئ هايل

والستات دي حظوظ

الستات دول وابل

مايجيش للمحظوظ

واللي لست يقابل

قدره يعِيش موكوس

يفضل عمرُه يناضل

ويبقى نهاره كابوس

يبقى خلاص مش فاضل

إلا يروح محبوس

ف الخانكه إن كان واصل

يلقى مكانه محجوز

إتجن وكان عاقل

مسكوه ماشي بلبوص

بعد ما كان يوم طايل

ياخد لقب الكوز

وبعد ما كان متفائل

بقى راجل منحوس

وأي أمور ومسائل

ييجي حلها معكوس

تملا حياته مشاكل

وكل ماحاجه تعوز

تيجي تقول أنا حامل

وهجيب المحروس

عايزاه خارج داخل

يِيجي فوق راسها يبوس

وشهور تسعه يناول

حتى إن كان دبوس

وماما يوماتي تقابل

تاخد منها دروس

يبقى الشغل الشاغل

ريشه يكون مقصوص

و طول اليوم ف مشاغل

وتنيّمُه مقموص

وتصحيه بقنابل

لجل يقوم مفزوز

يلقى الدمع السايل

ويشوف أجدع بوز

وتغنيله يافاشل

وجوزي ياناس مهزوز

وآجل بقى أو عاجل

عمره يروح منقوص

لكِن يفضل راجل

حوا عليه ما تدوس

وصوتي يجوز مش واصل

بس أكيد محسوس

أنا مبحبش أجامل

دا تقرير مدسوس

 

يعلن الموقع عدم مسئوليته عن محتوى هذه القصيده

ويسعى الموقع من خلال هذا الإعلان إلى التعبير عن شديد إحترامه للمرأه وإعترافه بأهمية مكانتها

والموقع ينشر القصيده لإيمانه بحرية الرأي وعلى الشاعر أن يتحمل نتيجة مثل هذه الشطحات الشديدة الخطوره

0
0
0
s2smodern