حوا حبيبتي - الأكثر قراءة

الدايّة

الزيارات: 696
تعطيل النجومتعطيل النجومتعطيل النجومتعطيل النجومتعطيل النجوم
 


ألف خساره

إني ماليش غير بس لسان

واحد أيوه .. لكنه حصان

قولي ألاطه .. قولي غتاته

إيه قيمة رأي النسوان؟

دول عايشين ف الدنيا عواله

ولا بقى ليهم لازمه الآن

من يوم ما أخترعوا الغسـَالـَّه

أصحاب العقل الجدعان

بالكَهربا على طول شغاله

ولا تِتعبش م الدوران

أما الست حالتها دي حاله

ولازم جوزها يجيله جنان

عايزاه ليها يقول ياغزاله

وإن كانت وزن الأفيال

وإن كانت شبه الرجاله

برضه بكدب يقول دا جمال

رغم إنها لو جوه مرايه

شافت روحها بدون ألوان

تلقى دوسيه مليان بِقضايا

متبهدِّل ومالوش عنوان

بُصِّي عليه وإتخضي معايا

فكرتيني بوِّش الدايه

أصلها كانت برضَّك ست

أول مانا شُفتها .. بَلمّت

و لو بإديّا .. كنت رجعت

 و أما كبرت .. يومها فهمت

ليه أنا جيت للدنيا .. صرخت

وكل مشُوف ستات أتخض

فأنا دلوقت .. لما بقوم م النوم الصبح

أول حاجه أعملها .. أكـُح

مش بتمنظر

لأ ده عشان تظبيط المنظر

أصل الست الصبح مصيبه

حاجه رهيبه

زي خريف

زي رصيف محتاج تنضيف

زي رغيف العيش البايت

وأوصاف ياما كتير إتقالت

فأتكلمي عن ميل البخت

حاجه عشان تضييع الوقت

وأما تلاقي قرار بالظبط

قوليهولي في الرد الآتي

وأنا بصوابعي هلعب ضـَغط

وبقلمي همرن عضلاتي

يعلن الموقع عدم مسئوليته عن محتوى هذه القصيده

ويسعى الموقع من خلال هذا الإعلان إلى التعبير عن شديد إحترامه للمرأه وإعترافه بأهمية مكانتها

والموقع ينشر القصيده لإيمانه بحرية الرأي وعلى الشاعر أن يتحمل نتيجة مثل هذه الشطحات الشديدة الخطوره

0
0
0
s2smodern