هرجع التذاكر
و أروحها ماشي كمان
و خلاص مانيش مسافر
على مصـر للطيران
مش ناقصه يا ناس مشاكل
مش ناقصه خلاص جنان
دا أنا خارج و لا داخل
بتخانق ع الميزان
و إن حكمت السنادي
مسافرش برضه عادي
علشان طيران بلادي
يرتاح و يكون فرحان
عايزيني أدفع عربون
هو أنا بقبض مليون
طب دا أنا لو أدفع أكون
شهـرين و تلاته جعان
أنا هاخد رأي مراتي
و الواد إبني و بناتي
و إن وافقوا هشوف عجلاتي
و نجيب عجله رهوان
أنا هنزل طول و عرض
لو حتى جوة طرد
من غير ميشوفني حد
هكتب بيتنا العنوان
هنزل لو تاتا تاتا
بالعند و بالغتاته
إسبوع إتنين تلاته
أحسن من إني أتهان
إتغير المدير
قالوا الجديد أمير
و إحنا اللي مافيش ضمير
لازم ندفع ضمان
المصري يا ناس طول عمره
دايماً مغلوب على أمره
أنا هنزل مصر بكارو
قوتها نص حصان
و هرجع التذاكر
