قصائد ساخرة - الأكثر قراءة

رباعيات من غير جناحات

الزيارات: 678

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

قفص و جوا منه جوز فراخ

عدىَ عليهم ديك ـ عطس يا عيـني و داخ

قالوا بسيطه ـ دي بس أَنفلـوَنزا

أرحم من جنون البقر ـ بيلحس اللمخاخ

يا عيني غلبان الفرارجي

سَتار يارب و منجي

الشوطه هجمت عَ الفراخ

لا عاد ينفع حكيم و لا حتى ميت تمرجي

اللحمه صبحت خطر لو حتى مشويه

بعد جنون البقر ـ شوطة الفراخ جايه

يا ميت مبروك علينا ـ فولنا المدمس إنتصر

أربعه و عشرين ساعه ـ معدتنا مستكفيه

فرخه قالت لإبنها الكتكوت عباره

قالت يا ولدي الموت ـ بيجينا بدون إشاره

بالأنفلونزا نموت ـ أَحسن ما نموت في القطر

أو تغرق بينا العباره

مبحوح يا ديك صوتك ـ و لا عدت قادر تدن

قـَرب معاد موتك ـ و إن مت مش هنحزن

ناوي تكتبها الوصيه ؟

و لا خلاص ـ إسم الوريث معلن

يا فرخه نافشه الريش ـ و نهار و ليل تكاكي

تحاولي ما تحاوليش ـ الشوطه جاياكي

فنصيحتي متستنيش

روحي زوري الشيخ كنتاكي

يا فراخ يا مسجونـة ف عشش ـ لإمتى هـتفكري؟

العـيشه مش مضمونه ـ كاكي يالا و إتحرري

إِوعي تخافي السجان ـ بكره الأيام هـتخونوا

و إنت ف عيونه تنقري

0
0
0
s2smodern