ما جاش لسه الهلال ولا هل
محدش لسه صام
و إحنا بيشغل بالنا الأكل
و آدان المغرب على كام
و نراجع إيه المخزون
و نخلل فلفل و لمون
و بنبدأه بزبيب و ياميش
و الآخر كحك و قراقيش
و بطولة مين الفوازير
كانوا زمان نيللي و سمير
و مسلسل حلقاته كتير
قصه قـَديمه بدون تغيير
و المذيعات ويا المذيعين
فرصه عشان يبدأوا في رجيم
و دا برنامج كله أغاني
يخلص فيه برنامج تاني
كله حكاوي و كاني و ماني
نضحك بالصوت الحياني
أبصر إيه إتجوز مين
و دي عملت عقد لفلمين
و اللي هترقص يوم العيد
جابت بدله موديلها جديد
و الباقيين يصرفوا ملايين
على فوانيس صنعت ف الصين
و دا برنامج كل على مهلك
إعرف بختك إيه من أكلك
بس ضروري إنك تتسحر
قبل ما تسمع الله أكبر
و إن كان أكل مراتك عاجبك
الناس تتريق على جهلك
عاملالك ع السفره كمين
عشرين صنف سمين ف سمين
عايزاك بقلظ كدا وطخين
مالناش دعوه إنتم حرين
و اللهم إننا صايمين
و تروح بقى على شغلك نايم
مش شغال مقدرش أنا صايم
و إن كانت أستاذه الهانم
هتغير في الفصل معالم
تلاتين يوم يتحول مطبخ
و التلاميذ وياها هتطـبخ
هيقرطفوا للأبله سبانخ
و يا ويله اللي يقول مش طـابخ
لو كان شاطر يبقى بليد
يسقط يعني السنه و يعيد
و إن روحنا نصلي التراويح
نغمات المحمول تفاريح
تخلص نجري قـَوام كالريح
فيلم السهره حلو صحيح
بعده هيبقى اليوم خلاويص
و نقول صومنا لرب عزيز
نتسحر و نروح ناويين
اللهم إننا صايمين
و لا نسألش لماذا و هل
و إن كان مسموح و لا حرام
كدا مش نافع لازم حل
دا ما أسموش صيام
ما جاش لسه الهلال ولا هل
محدش لسه صام
و إحنا بيشغل بالنا الأكل
و آدان المغرب على كام
