قصائد متنوعة - الأكثر قراءة

ماتت أمي

الزيارات: 445
تعطيل النجومتعطيل النجومتعطيل النجومتعطيل النجومتعطيل النجوم
 


ماتت أمي اللي علشانها

كان ربنا دايماً يكرمني

ماتت أمي اللي ف أحضانها

كنت بلاقي اللي يطمني

ماتت أمي وطول أيامها

كانت هي العين والنني

ماتت أمي الله يرحمها

روحي حبيبتي .. إتخطفت مني

ماتت أمي وشالوا كفنها

وأنا مقدرتش .. غصبن عني

وهو دا أصعب شئ ف الغربة

تبقى بعيد ويروحوا أحبة

مرة قريب .. ومرة يغيب واحد م الصحبة

تعرف إن ملكش نصيب

ومش هتشوفهم غير ف التربة

ناس بعيونك كنت تشوفهم

تلاقيك شايف جوا قلوبهم

ناس من أول مرة تقابلهم

تلقى أمان الدنيا ف توبهم

أمي دي منهم

أمي دي كانت أعظم أم ف كل الدنيا

آه والله

عارف أنك برضه أكيد

هتقول نفس الشئ عن أمك

قول على راحتك .. كرر عيد

أنا مش رافض .. قول من حقك

لازم تبقى الأم ف عيني وعينك

أعظم واحدة

أو تخسرها الدنيا ودينك

لو ماتت عنك مش راضية

وأنا بحمد ربنا من قلبي

حقق ليا مرادي وطلبي

كل الناس وأخواتي قالولي

أمك كانت طول الوقت بتدعيلك

وأنها وصتهم يقولولي

راضية عليك ياضنايا بسيبك

فضلوا الناس يقولولي يابختك

لو دعا أمك كان من حدك

دعوة وحيدة تكون ف نصيبك

مش هيكون ف الدنيا دي قدك

ردت فيا الروح .. جري دمي

ما أنا كان خوفي كله وهمي

لتكون ماتت زعلانة مني

أصلها عرفت وقتها أني

مش هقدر أحضر دفنتها

ولا أصليها صلاة جنازتها

إنما أمي ودي طبيعتها

سامحتني من قبل موتتها

بعديها راحت عند بارئها

رجعت أمي خلاص لخالقها

وصلت رحلتها لنهايتها

ومين ف الدنيا مش هيسيبها 

وانا هفضل طول عمري فاكرها

ولا جمايلها ف يوم أنكرها

ودايما عنها هيكتب قلمي

ويقول عنها دي كانت

أعظم أم في كل الدنيا

أيوا فاتتني وماتت

بس حنانها بيجري ف دمي

ماتت أمي

0
0
0
s2smodern