قصائد متنوعة - الأكثر قراءة

خُد بالك

الزيارات: 54
تعطيل النجومتعطيل النجومتعطيل النجومتعطيل النجومتعطيل النجوم
 

هاخدُه بالي

بس قولي آخده إمتى .. وآخدُه مشغول ولا خالي؟

يعني آخدُه حتة حته .. ولا آخدُه ع التوالي؟

هاخدُه بالي

وناوي أحُطُه ف أي شنطه .. أصلي ساكن ف العلالي

والمسافه ميت محطه .. والطريق محتاج ليالي

هاخدُه بالي

رغـم خوفي تكون دي خطه .. يبقى بال واحد بدالي

ولا تغلط أي غلطه .. من ورايا أو قبالي

هاخدُه بالي ليه ماخدش؟

مش هخاف منك وأكش

دي الحقيقه مش بغش

بالي هاخدُه متنازلش

بالي هخده حبة حبة

ومش راح أدفع أي قرش

بالي هاخده وسط غربة

عمري فيها ميتحسبش

وإن لاقيت فيه ورك بطه

مش هسيبه متحاولش

بس عايز جنبه سلطه

أصله بال واحد ماكلش

من سنين غير الأونطة

اللي فاقت احتمالي

هاخدُه بالي وإنت تاخد

لما آخدُه برضه بالك

ولا شوفلك أي واحد

يرضى يخدولك بدالك

خت بالك؟

خُد كمان

بال جديد مش بال زمان

بال بدون قسوة حبايب

ولاّ شكوى من جيران

بال لشاب مش لشايب

بال لإنس مش لجان

بال عجيبة م العجايب

بال هتاخده تقول جنان

بال هتاخده تلقى حالك

مختلف مش زي حالي

بال هتاخده باختيارك

بال هتاخده تقول حلالي

ويبقى ليك بالك لوحدك

ويبقى وحدي ليا بالي

يعني تعمل مابدالك

وأنا أعمل مابدالي

خت بالك؟

ولا أقولك أنا مالي

تاخده ماتخدوش براحتك

المهم أني آخده بالي

بس قولي آخده إمتى

وآخدُه مشغول ولا خالي

يعني آخدُه حتة حته

ولا آخدُه ع التوالي؟

0
0
0
s2smodern