قصائد متنوعة - الأكثر قراءة

وحشتيني كتير يا أمّة

الزيارات: 251

تقييم المستخدم: 0 / 5

تعطيل النجومتعطيل النجومتعطيل النجومتعطيل النجومتعطيل النجوم
 

بقالي كتير مابكتبش عشانك شعر

ما قلتلكيش واحشاني .. و ف بعادك بقاسي المر

مبحكلكيش أحزاني .. وإيه ع البال ساعات بيمر

بقالي سنين كتير يا أمّه .. وأنا مشتاق قوي لضمة

للحظة ف حضنك الدافي .. لطبطبتك على كتافي

لطيبة قلبك الصافي .. ولما عليا بتخافي

أحس بجرح من كلمة

وحشتيني كتير يا أمّه

بقالي كتير يا ست الكل .. ما قلتلكيش صباح الفل

بقالي كتير مبسمعكيش .. ولا قادر عليكي أطل

ما أنا يا أمه ف بلد تاني .. ومنك غربة واخداني

و طول ما أنت بعيد عني .. بحس بروحي واحداني

نهاري وليلي أتمنى .. قريب يبقى اللقا بينا

وأشوفك طيبة وسالمة

وحشتيني كتير يا أمّه

وحشني بيتنا واللمة .. وطعم الحب ف كلامنا

وحشني فرحتك لما .. سوا طبلية تجمعنا

وحشني كتير طبيخ إيدك .. و ريحة الكحك وخبيزك

وحشني نظرة من عينك .. وتسمع ودني حواديتك

ياريت قادر أكون جنبك .. وأحط دماغي على حجرك

وأنسى غربتي الظالمة

وحشتيني كتير يا أمّه

ساعات يا أمة أروح سارح .. و أرجع تاني لإمبارح

معاك أمشيها مشاويرك .. وأمسك طرف جلابيتك

محسش روحي متحير .. ولا خايف وأنا صغير

يا أمي العالم أتغير .. وكل الحلو فيه مرر

ياريتني يا أمي مكبرتش .. وعنك لحظة مبعدتش

يا ضيي ونوري ف الضلمة

وحشتيني كتير يا أمّه

جمايلك يا أمّه فوق راسي .. مابنكرهاش ولا ناسي

حاولت ف مرة أكتبها .. وأرتبها وأحسبها

لاقيتني ف حيرة من أمري .. وعايز عمر فوق عمري

لاقيتها ف دم شرياني .. في كل خلية ف كياني

في كل دقيقة ف أيامي .. و كل حروفي و كلامي

دا بس رضاك باب رحمة

وحشتيني كتير يا أمّه

 

0
0
0
s2smodern