سلامة قلبك الطيب
سلامة قلبك الحساس
ياريت ما تغبش و قريب
نشوفك تاني يا أغلى الناس
سلامتك م الوجع ياحميد
من الآهَّه من التنهـيد
و حاسب ع الحبيب يا طبيب
و شيلهُ عشانا فوق الراس
سلامة قلبك الإنسان
من الأوجاع .. من الأحزان
و ترجع تاني يا فنان
تقول ألحان بلون الماس
غيابك عنا خلا النوم
مخاصم عينا ليه كام يوم
و حتى القلب بقى محروم
يكون قادر على الإحساس
ياريت قادرين نكون جنبك
نطمن روحنا على قلبك
نقولك إحنا بنحبك
و ندعيلك بالشفا بإخلاص
تملي كلامنا عنك خير
و إن إنت ساعدت كتير
تعالى كفايه بقى تأخير
دا شوقنا إليك قتلنا خلاص
