قصائد متنوعة - الأكثر قراءة

تـُووووووووت

الزيارات: 2700
تعطيل النجومتعطيل النجومتعطيل النجومتعطيل النجومتعطيل النجوم
 

مسيرها هتحلا وتروَّق

وهتخضر الأرض البور

هتطلع شمس وتشقشق

و بعد العتمه هييجي النور

رغم إن إحنا ما بينا جبال

و بتبعدنا بلاد و بحـور

بس لقـانا ماهوش محال

ماهي أرضنا طلعت بـِتدور

بتمرجحنا يمين و شمال

و أكيد يوم هيصيبنا الدور

و هيتغير بينا الحال

بس البني آدم مغرور

مهما نقول عمره مبيصدق

إلا إن كان على شئ مجبور

مسيرها هتحلا وتروق

وهتخضر الأرض البور

توت ورا توت يا وابور يا مـسافر

خدني معاك وصلني الآخر

عنـد بلادي هناك وديني

إجمع تاني ما بينها و بيني

دا أنا متغرب كدا على عيني

عماله تهرب مني سنيني

فوت ياوابور يالا وعديني

دي الغربه مرارها بيكويني

و بتاخد أيامي وتسرق

و لا همها قلبي المكسور

مسيرها هتحلا وتروَّق

وهتخضر الأرض البور

زي القطر الدنيا تفوت

كل محطه يزمر توت

توت ورا توت قول يالا ياصاحبي

إوعى تداري إوعى تخبي

دا اللي ف قلبك زيه ف قلبي

و مناك نفس منايا و طلبي

ترجع بلدك و أرجع بلدي

و معاك بدعي يوماتي ياربي

نفسي أشوف الحلم إتحقـق

وتعود من هجرتها طيور

مسيرها هتحلا وتروق

وهتخضر الأرض البور

0
0
0
s2smodern