قصائد متنوعة - الأكثر قراءة

مش شاعر

الزيارات: 1042
تعطيل النجومتعطيل النجومتعطيل النجومتعطيل النجومتعطيل النجوم
 

يالا نبدا مرة تاني من جديد

يالا نغزل بالحروف توب للمشاعر

تعالى نبني بيها بيت

و لا نزرع بيها غيط

أو نطمن قلب حاير

يالا بينا

إوعى تسكت دا أنت شاعر

بس لو حرفك معاندك .. قلبي عندك

أما لو غرضك أساعدك .. يبقى عافر

لو هتبري سن قلمك بالضوافر

حس ألمك

إبتدي تشعر بجرحك

حبة حبة راح تعاني .. و الكلام تلاقيه يطاوعك

إنت توهبله المعاني .. و هو يبقى تحت أمرك

دا أنا مجرب

كتير مني الكلام يهرب .. و يبعد عني ميقرب

و أنا أفضل وراه أجري

ساعات أسهرله طول الليل

ساعات أصحاله من بدري

و أغنيله ساعات مواويل

أقول يمكن يروق فكري

ساعات ألاقيه ملا صدري

أقول أخرج ما يرضاش

أحايل فيه ماهوش عايز

أروح أغضب .. تشوف حالي عليك يصعب

كأني لتوي متكهرب

بصوت مرعوش .. أقوله خلاص أنا مخاصمك

و مكتبهوش

خلاص يا كلام مانيش عايزك

دا ناقص أبوس حرفك

خلاص يا كلام على راحتك

و مهما عملت مش كاتبك

و أعمل نفسي مش حاسه

و حاسس أي شئ عكسه

يقوم ييجي كدا لوحده يصالحني

يقولي بسرعة إكتبني

أبوس إيدك تجيب قلمك

بلاش تنساني و تسيبني

أنا ف طولك أنا ف عرضك

و لو بعديها تشطبني

فمن طيبتي أروح طابب

أسامحه و تاني نتصاحب

و أروح كاتب بدون ما أقصد

و أنا دايب و بستعجب

و قلمي ع السطور يركض

و خايف لا الكلام يعند

و نفسم أفهم و مش قادر

جاويته إزاي قوام حاضر

و صفحة بحالها أكتبها

و يمكن حتى أقلبها

و كل دا كله و أنا تايه

كتبته و كنت .. مش شاعر

0
0
0
s2smodern