قصائد متنوعة - الأكثر قراءة

قلبي بيوجعني

الزيارات: 1006
تعطيل النجومتعطيل النجومتعطيل النجومتعطيل النجومتعطيل النجوم
 

كان ليّا صاحب باعني

من غير سبب ودعني

جريت أنده عليه

ما رضيش يسمعني

مديت إيدي لإيديه

بَعَّد إديه عني

مقدرتش أفهَّم ليه

من قُربُه يمنعني

قُولُه ياللِي تلاقيه

قلبي بيوجعني

كان ليّا صاحب زي شقيق

مع بعض كُنا ف هنا وف ضيق

إختار لوحدُه يروح ف طريق

و لا قالش كلمه تبل الريق

ف بحور دموعي لقتني غريق

و لا عادش مركِّب ينفعني

قُولُه ياللِي تلاقيه

قلبي بيوجعني

كان ليّا صاحب مشِي من غير

ما يقولِّي أشُوف وشك على خير

معقوله ديّا يا ناس دا كتير

هو اللي بينا ما كانش كبير؟

و الله عقلي خلاص هيطِير

و نار فراقه بتلسعنِي

قُولُه ياللِي تلاقيه

قلبي بيوجعني

كان ليّا صاحب فاتني و غاب

من غير ميشرحلِي الأسباب

دقِيت عليـه ما فتحش الباب

و كأني عنده ماليش حساب

طَب كان عاتبني أي عتاب

مافهاش حاجه يا ناس يعني

قُولُه ياللِي تلاقيه

قلبي بيوجعني

0
0
0
s2smodern