قصائد متنوعة - الأكثر قراءة

مين أنا ؟

الزيارات: 1148
تعطيل النجومتعطيل النجومتعطيل النجومتعطيل النجومتعطيل النجوم
 

يالا حاول مره تانيه

ومره تالته

و لا مليون ألف مره

كل مره تشوف إجابتك

مش هتبقى هيّ هيّ

ياما من قبلك حاولت

و السؤال نفسه سألت

بس مكدبش عليك

برضه ف الآخر فشلت

مين أنا؟

الإجابه إن قولتهالك

مش هِتلقى فيها غرضك

صعب ع الآخر سؤالك

غصب عنك مش بقصدك

إبن آدم زيي زيك

زي منك إبن تسعه

جيت يجوز للدنيا قبلك

و إما جيتها لقيتها واسعه

زي منك جيتها باكي

و الدموع من عيني نازله

كنت طفل و فات شبابي

عشت لَمه و شفت عُزلّه

شفت صبح و شفت مغـرب

بعرف أقرا و أعرف أكتب

مرة أصدُق مرة أكدِّب

مرة أفرح مرة أغضب

و زيي زيَّك

لما أجوع بضطر آكل

و أما أعطش لازم أشرب

مرة أغرق ف المشاكل

مرة تانيه ألقى مركب

مرة تحاصرني المشاغل

مرة منها أقدر أهرب

مرة أغلط ف المسائل

مرة أقدر صح أحسب

مرة أبقى م الأوائل

مرة مغلوب مرة أغلِب

مرة أنشَّط مرة أتعب

مرة أقبل مرة أعـَانـِد

مرة أوافق مرة رافض

مرة قلبي يبقى دايب

مرة زي الصخر و أجمد

مرة أشتاق للحبايب

مرة أخاف منهم أقرب

يعني طبعي نفس طبعك

و زيي زيك

إتولدت بقلب طيِّب

قلب زي القطن الأبيض

بس حسيت من قريِب

إن لونه خلاص بِيبهَّت

و اللي جي لسه أغرب

مرة أحب مرة أكره

مرة أفرح بالنهارده

مره أحلم يِيجي بكره

يوم مشاعري تبقى بارده

يوم دموعي تروي شجره

يعني أنا مش وصفه ثابته

بعد منها تحط نقطه

طب دا حتى

ببقى غيري ساعات بغلطه

و أبقى غيري إن روحت حته

أو فاتتني المحطه

طب دا أنا ف أول يناير

غيري خالص شهر سته

حتى حالي إن كنت حاير

غيره حالي لما بهدَّى

بس برضك زيي زيك

و إنت مين لو جيت سألتك

زيي برضه هيبقى ردَّك

راح تقول زيي أنا

و الكل هيقول زينا

واحدة الإجابة الممكنة

حتى إن قعدنا ميت سؤالنا

نسأل ف روحنا مين أنا

0
0
0
s2smodern