إحتجت لقلمي حبر
فاضيه لقيتها الدوايه
مشغول بقيت الفكر
إزاي هوصف هوايا
مش قادر ألاقي عذر
معقولة دي النهايه؟
من بعد طول الصبر
مش قادر أعبر عن جوايا
و لا هوصل خطوه لبكره
و لا هقدر أعيد الذكرى
و لا أعبر عن إحساس
أو أوصف أيُها فكره
و إزاي تفهمني الناس؟
دي الكلمة بكل إيجاز
في حياتنا أهم أساس
ممكن تلاقيها رصاص
أو ممكن تبقى سلام
حب و ود و إخلاص
أو تبقى عناد و خصام
يا تكون يا سجون يا خلاص
يا تكون كوابيس أو أحـلام
بنطير بالكلمة لفوق
و نعبر بيها عن شوق
و بالكلمة ضروري هنوصل
مهما ف أيامنا هيحصل
و إن كان الحبر بِيخلص
فلسانا عمره ميخرس
و لا نرضى نكون ساكتين
و الحبر مش هو المشاعر
و لا هو إحساسنا الدفين
و إزاي هيبقى بينا شاعر
و هو حبة ميه ملونين
و يا مين يجيبلي شاعر
يـقولي كلمتين
ف إديّا قلمي حاير
أجيبلُه حبر منين؟
