قصائد متنوعة - الأكثر قراءة

برواز من إزاز

الزيارات: 1233
تعطيل النجومتعطيل النجومتعطيل النجومتعطيل النجومتعطيل النجوم
 

النهارده زي عادتي

كنت وحدي

تاني بين أربع حيطان

كنت ماسك قال بيدي

صوره من صوري زمان

كنت راكب جوه منها فوق حصان

كنت فاكر نفسي فارس

كنت فاكر إني عنتر

كنت حاسس .. إني أبو زيد و لا أكتر

كان يوميها لسه جايز .. إني أحلم قد مقدر

كنت لسه غصن أخضر .. شاب أسمر

كان ف بالي لما أكبر .. هبقى قادر إني أغيَّر

لما هكبر و أبقى راجل .. مش هيبقى فيه مشاكل

يعني آجل و لا عاجل .. هقدر أوصل و أبقى طايِّل

كان خيالي زي طايِّر

كُنت شايف كل حاجه .. لونها وردي

كان فاضلي بدون سماجَّه .. إني أسأل

مين يا دنيَّا فيكي قدي؟

و النهارده زي عادتي

كنت وحدي

تاني بين أربع حيطان

كنت ماسك قال بيدي

صوره من صوري زمان

الـصورادي

آه دهيَّه

زيهَّا زي البقيَّه .. ليها ذكرى عايشه فيّا

كنت لسه روح أبيّه .. لسه معملتش خطيّه

لسه متعلمتش أكدب .. و لا أسرق و لا أنهب

أو مكونش صافي نيّه

كان منايا ألقى ليّا .. سكه ف سنيني اللي جايه

كنت مبشوفش بعنيّا .. الآلام المداريّه

كنت هادي .. كنت راضي

م الهموم كان قلبي فاضي

فجأه أصبح كلُه ماضي

غصب عني و مش بقصدي

و النهارده زي عادتي

كنت وحدي

تاني بين أربع حيطان

كنت ماسك قال بيدي

صوره من صوري زمان

الصورادي

اللي فيها جنب مني .. مستحيل لساه فاكرني

و الحقِيقه لولا صورته .. كنت عمري ما أفتكرته

و صعب لو مره قابلته .. قبل ما أسمعها حكايته

من ملامحه أقول عرفته

و زي منه ياما عدوا .. قبل منه و ياما بعدُه

كل صاحب كان له وقته

اللي راح ف طريق رفضته .. و اللي يوم فاتني بإرادته

اللي فُته بفعل عندُه .. و اللي ليّا ماصانش عهده

و اللي عندي سطور بخطه

غير صحاب إيد ليّا مدوا .. أو صحاب أحلامي هدوا

فيه صحاب لندايا ردوا .. و اللي سمعوا صوتي بعدُوا

راح دا فين أو فين دا أرضُه

اللي يعلم ربي وحدُه

و إبن آدم هو وعدُه .. مش هيوصِل يوم لغرضه

فجأه بل الدمع خدي .. ويّا صوره فيها صاحبي

مات و موته هز قلبي

زي ما يكون مات بسببي .. حتى ذنبه حاسُه ذنبي

راح بسره المستخبي  .. و كل مره أفتكره أبكي

مات غريق من غير ما يشكي .. سابني عايش ويّا شكي

ليه ما جاش لعندي يحكي؟ .. و لا ليه ما لاقـاش يدي؟

أو سألني و جعله ردي .. تانـِي قادر ع التحدي

و يلقى جسر عليه يعدي

كنت يمكن أبقى مرضي

و النهارده زي عادتي

كنت وحدي

تاني بين أربع حيطان

كنت ماسك قال بيدي

صوره من صوري زمان

الصورادي

كنت تلميذ ف إبتدائي

وسط شله من رفاقي

لسه فاكر الأسامي إسم إسم

فيه نشيد من يومها لسه حافظه صم

لسه فاكر يا أبني ذاكر

خلي بالك من دراستك

يا أبني يالا حل واجبك

يا أبني دا سلاحك شهادتك

و الشهادة هي قيمتك

يعني قيمتي بالمجاز

و لا حتى بالقياس

ورقه محطوطه و خلاص

جوا برواز من إزاز

يعني دي حاجه و خلاص

أفتكر بيها العزاز

و ذكرى أيامنا اللذاذ

و الشقاوه زمان و عندي

و آهو فات شبابي و عدى وقتي

بس منستش اللي كان

و النهارده زي عادتي

كنت وحدي

تاني بين أربع حيطان

كنت ماسك قال بيدي

صوره من صوري زمان

0
0
0
s2smodern