قصائد متنوعة - الأكثر قراءة

إسأل ربنا

الزيارات: 1625
تعطيل النجومتعطيل النجومتعطيل النجومتعطيل النجومتعطيل النجوم
 

إوعى تستنى جواب

من أي شاعر

أصله بيعمل ميت حساب

في جوابه للمشاعر

ممكن يخاف من كلمه تجرح

أو يخاف لخياله يسرح

و ممكن لوحده فجأة يكتب القلم

فتعوم معاه ف بحور ألم

و تموت غريق جوا الكتب و الكراسات

اللي قصاده فرشتها

مش راح تفيدك وقتها الأمنيات

و لا أي حاجه حلمتها

الشعر مش طوق النجاه

الشعر مش إزازة الدوا

و الشاعر مش طبيب

الشاعر أحلى وصف ليه

إنسان غريب

فأزاي تفكر تسأله

إزاي تفكر

إنك هتقدر تفهمه

متكونشِ فاكر إنه عايش زينا؟

متكونشِ فاكر إن قلبه

جواه بيشبه قلبنا؟

فنصيحتي ليك يا صاحبي

من جوا جوا قلبي

لو كان سؤالك عن حكاوي

هيجاوبك عنه راوي

و إن كان سؤالك عن غناوي

هيجاوبه الأصفهاني

و إن كان سؤالك ع اللي هد

و مين بنى

في التاريخ هتلاقي رد

و إن كان سؤالك صعب جد

عن حاجه فاقت علمنا

أَوعن كواكب في السما

أو زهره نبتت جوه أَرض

أو عن حياتنا و عمرنا

أو حاجه لسه مجتش بعد

فأسأل بقَلبك ربنا

مش راح يجاوبك مهما تسأل

غيره أبداً أي حد

0
0
0
s2smodern