قصائد متنوعة - الأكثر قراءة

كانوا العرب

الزيارات: 1119

تقييم المستخدم: 5 / 5

تفعيل النجومتفعيل النجومتفعيل النجومتفعيل النجومتفعيل النجوم
 

تجربتي مع الشعر على الإنترنت هي تجربه أستطيع على الرغم من قصرها أن أصفها بالثريه إذ أني قد وجدت فيها وسيلة للتواصل مع كثير من الشعراء والقراء والدخول في حوارات ومناقشات عديده حول مواضيع مختلفه كان لها أثرملحوظ على قلمي ولم يكن يدر بخلدي يوماً أن يتهمني البعض وآخرون معي يكتبون شعر العاميه بأننا نحارب لغة القرآن .. إتهام شديد القسوه وشديد السطحيه أيضاً من وجهة نظري المتواضعه ولا أريد أن أذكر تفاصيل هذا الحوارالذي لم يخلو من مفردات إن لم تكن تشير صراحة إلى الكفرفإنها تشير بصورة مباشره إلى الخيانه فزهدت الحوارهناك وكتبت هذه القصيده محاولاً من خلالها أن أعبرعن قناعتي الشخصيه ورؤيتي الخاصه لهذا الأمرالذي كان لي بمثابة الصدمه ولكني لم أتيح القصيده للقراءه وقتها بعد توقفي عن هذا الحوارالذي وجدته عقيماً وغير منطقياً ولا طائل من وراءه

 

كانوا العرب

قبل الرسول ـ ـ عرب

و كان لسانهم الفصحى

البنت كانت تِتوأد

أحجار و أصنام تتعبد

و الخمره ريحتها فايحه

و كتير كان اللسان

بِيقول حاجات جارحه

كانوا بارعين ف البيان

و قله ف الأدب

و كان بينهم شيطان

إسمه أبو لهب

كانوا العرب

قبل الرسول ـ ـ عرب

و كان لسانهم الفصحى

و شاء ربنا الرحمن

و أرسل وحيُه بالقرآن

على خير البشر .. طه النبي العدنان

الله أكبر أصبحت .. هـيَّ الآدان

العدل نوره إنتشر .. و الحق طريقه بان

الناس نفوسها إتغيرت .. و قلوبها طهرها الإيمان

الكون طبيعته إتفسرت .. و فهمنا يعني إيه إنسان

إتخيلنا اللي جىَّ .. و عرفنا إيه قبلينا كان

و إن إنت يارب وحدَّك حيَّ

خلقت لينَّا الحِكمه .. و خلقتِلنا البيان

لا كنا نعرف كلمه .. و لا كان ينطق لسان

علمت آدم الأسامي كلها

سكتوا الملايكة .. لما عنها سألتها

قالوا سبحانك لا نعلم

إنت بيها و بينا أعلم

وحدك العالم يارب

باللي جوه كل قلب

إنت خالق كل معنى

و إحنا محدوده عقولنا

و إن سكتنا و لا قولنا

إنت عارف إيه ضميرنا

و اللي آمن و اللي ضل

و مين ما صانش الكلام

و الأصل ف الشريعه حل

و بدليل لو كانت الفتوى حرام

مش بس فُرقه بدون سبب

كانوا العرب

قبل الرسول ـ ـ عرب

و كان لسانهم الفصحى

و إن كان للكلمة بحور

بالفصحى أو عاميه

لو نملى الأرض سطور

بلغات دنيتنا دهيَّه

فكلام ربنا مسطور

معجزة الكون الإلهيَّه

و حروفُه هتفضل نور

ع الأرض لكل البشريَّه

و دايماً محفُوظ ف صدور

من غير و لا آيه منسيه

فأكتب بقلمك كلمتك

واضحه صريحة

إكتِبها و إنت و همتك

عاميه أو فصيحه

إكتبها و إنت ف نيتك

تجعل منها نصيحه

فيها صالح أمتك

و ف معناها صحيحه

و إختار بنفسك سكتك

ما تسِبش حد يسكتَّك

و مادام حروفك طاوعتك

هتلاقي حد بيسمعك

و يلاقي في كلامك دهب

كانوا العرب

قبل الرسول ـ ـ عرب

و كان لسانهم الفصحى

قول اللي حاسه يا جدع

قوله حتى بدون سجع

قوله بعباره أو إشاره

أو حتى وشوِّش الودع

إوصِف و شاور ع الوجع

متكونش أخرس أو جبان

دي الكِلمه جندي ف الميدان

و إنت القلم ف إديك حصان

و الكِلمه سيف

فمادمت يا فارس شريف

إفضل إكتِب مهما كان

متسِبِش خوفك يمنعك

إدعِيه يارب هيسمعك

بأي لهجه أو لغات

عملك و بس هيِنفعك

قدامه من بعد الممات

و فارسي كان سلمان

و إنجليزي كان لسان ديـدات

و الكـِلمه أحسن من مليون سكات

مش مهم إزاي تقولها

المهم قيمتها ـ ـ دورها

و صدق نية من كتب

كانوا العرب

قبل الرسول ـ ـ عرب

و كان لسانهم الفصحى

0
0
0
s2smodern