قصائد متنوعة - الأكثر قراءة

وصل السلام

الزيارات: 1151
تعطيل النجومتعطيل النجومتعطيل النجومتعطيل النجومتعطيل النجوم
 

وصل السلام

وكمان وصلني يا صديقي

منك أحلى كلام

جاتني حروفك زي نور نور طريقي

و إندفن فيه الضلام

بلت سطورك اللي كان ناشف ف ريقي

و إترسم ع الشفه تاني إبتسام

حسيت بفرحه بعد ضيقي

و لقيتها طابت الآلام

جاني السلام

جايب معاه ريحة الوطن

و أيام جميله م الزمن

عارف سلامك جابلي إيه تاني معاه؟

جابلي (أنا)

أنا اللي سبته جنب نيلها و بين غيطانها

أنا اللي مرسوم فوق حيطانها

أنا اللي عاشق الضي في نهارها

لون خضارها

كل طوبه ف طوب ديارها

جابلي (أنا) معاه السلام

خدني في حضنه ضمني

و لاقتني لسه بحبني

آآآآآآآآآآه يا (أنا)

شوف قد إيه بُعـدي ـ ـ و غيابك هدني؟

لاقتني ميت من شوقي إليه

بيدق قلبي م اللهفه عليه

حسيت برعشة خوف ف إيدي

أو يجوز رعشة ف إيديه

قام قالي ممكن أسألك

فأنا قلتله إسأل يا بيه

عارف سألني قالي إيه؟

لما أنت يا جدع فرحان

إنك لاقتني و شُفتني

طب كنت ليه زمان

إخترت تمشي و فُتني

معرفتِش أنطق باللسان

أصل سؤاله خضني

و اللي بيسأل كان (أنا)

و اللي يجاوبُه

كان برضه لازم يبقى (أنا)

رَجَّع كَلامَك يا صديقي الحبايب القُدام

صَحى المشاعر و الأحاسيس النيام

وصل السلام

0
0
0
s2smodern