قصائد متنوعة - الأكثر قراءة

رسالة أب

الزيارات: 1140
تعطيل النجومتعطيل النجومتعطيل النجومتعطيل النجومتعطيل النجوم
 

هذه القصيده هي رسالة كتبتها نيابة عن أخ مسلم قسى عليه الوطن فأضطر للغربه عله يجد فيها ما ضَّن عليه به الوطن و أستقر به المقام و أصبح رب لأسره و حاول قدر جهده أن يتبع تعاليم دينه و عدم المساس بثوابته و رزقه الله بأبناء حرص على تربيتهم تربية تتفق و ما أمره به رب العزة سبحانه وتعالى و الرساله موجهة لإبنته التي كانت إلى يوم فارقته لا تفارق رداءها الإسلامي و لكن هكذا هي الغربه بل هكذا هي الدنيا لا تستقر لأحد على حال و هي حالة بكل أسف ليست فرديه في الغرب

رسالة أب

صعبان عليّا يا حبيبة قلبي .. حالك

صعبان عليّا صدقيني .. حالي

مش قادر أفهم إيه جرالك

و لا قادر أفهم ليه جرالي

مين كان يصدق ييجي يوم و يغيروكي

أو ليلة واحده يجِيكي نوم

من غير بوسة أبوكي

طب دا أنا حبِيتك

من يوم ما عرفت إن إنت جنين

حبِيتِك يوم ما جيتينا

لسه مفتحتيشي عنين

ما قالوشي شفايفك حرفين

و لا كانوا ملامحك باينين

و بقيتي بتكبري قدامي

أَوصِّل أيامك بأيامي

و عشانك أحلم أحلامي

معقوله أكون مش واحشك

زي إنت ما كدا واحشاني ؟

مش حاسه إن إنت لوحدك

كدا زي أبوكي ما واحداني ؟

بس أنا يا حبيبتي مسامحك

جايز نِستِيه عنواني

أنا ساكن لسه ف نفس البيت

اللي إنت كبرتي ف أحضانه

أنا حاطط صورتك ع الحيط

و فاتحلك يا حبيبتي بِيبانه

كل اللي ف أوضتك ف مكانه

و لعبك و عرايسك بيعانوا

أنا شامم ريحتك ف سريرك

و ف رف دولابك و أركانه

أنا مادد إيدي اللي شالوكي

و عيوني مناهم يشوفوكي

و إشتاقُم ليكي و خايفين

خايفين عليكي من غدر السنين

من ليل حزين

من ضلمه كُحل

من طريق مليان بطين

من ناس وشوشها ملونين

صعبتي ليه السهل ؟

هتجِيبي أهل منين ؟

دا أنا دمي يا بنتي ف شريانك

أنا عايش ف الدنيا عشانك

أنا حلمي أحقق أحلامك

أنا أبوكي يا بنتي يا حبيبتي

شُفتك قدامي إتكونتي

من نُطق لساني إتعلمتي

و لولايا ما كنتي إتكلمتي

تفوتيني إزاي لما كبرتي ؟

مقتول و بعادك سكينتي

و إن كنت نسيتي إنك بنتي

آهو قلبي بحب ناداكي

و أبوكي بيستناكي

بحلم من تاني معاكي

من قلبي أفرح وياكي

تجمعنا أماكن فاكراكي

و نقابل ناس بتحبيها

كان إيه يا حبيبتي رماكي

على سكه بعيد تمشيها ؟

سكه و آخرتها ندامه

ليها ألف دليل و علامه

سكه تخلينا بعاد

و تفرَّق بينا بـلاد

و لا تجمعناشِ بيوت

بناديكي بعالي الصوت

و أنا عايش قبل ما أموت

قبل الأيام ما تفوت

و عنيكي يملاها دموع

قبل ما تتمني رجوع

و تحسي بشوق لإمبارِح

بينا ندعي يارب تسامح

بينا ندعي يارب آمين

و بلاااااااااش

و بلاش تستني تعودي

من بعد نهايته وجودي

دا محدش م اللي خدوكي

هيحبك عمره يا بنتي

قد مبيحبك أبوكي

0
0
0
s2smodern