كنت قد أهديت هذه القصيدة إلى أخي الحبيب عامر وقرينته في يوم زفافهم
مبروك يا أهل العروسه
مبروك يا أهل العريس
ياعريسنا ألف بوسه
بقلوبنا معاك نهيص
جينا نشرب الشربات
و نسمع الزغاريد
لابسين أحلى الحاجات
و كأنه يوم العيد
يا عريسنا بنبارِّك
اللِيله زيك مين
ربك قسمهالَّك
تلقى شريكة السنين
يا جمالها يا جمالَّك
يِكفِيكوا شر العين
بس إنت خد بالَّك
و عليها تكون أمين
محلاها ف الطرحه
الكل بيها سعيد
يارب زيجه صالحه
يارب خِيركوا يزيد
تلقوا الورود طارحه
و الأحلام مش بعيد
و كل يوم فرحه
و الإيد متسبش إيد
م الفرحه بيكوا طاير
و حاسِس بالرضا
من بعد ما كنت حاير
راحة قلبك هبه
يارب بيتكوا عامر
متخشوش العدا
و تكون صافيه الضماير
و طريقكوا يكون هدى
يا عريس هنيالَّك
يا عروسه راد ربِّك
و آدي النصيب جالك
و الكل جه فرحلِّك
و الغالي علشانِّك
م اللِيلَّه يبقَى رخيص
و الزفة مخصوصه
م الدقي على رمسيس
مبروك يا أهل العروسه
مبروك يا أهل العريس
ياعريسنا ألف بوسه
بقلوبنا معاك نهيص
