قصائد متنوعة - الأكثر قراءة

أخويا

الزيارات: 879
تعطيل النجومتعطيل النجومتعطيل النجومتعطيل النجومتعطيل النجوم
 

ألف حمد ليك يارب

وإرضى عن أمي و أبويا

دا الطَريق كان يبقى صعب

و كنت أتوه من غير أخويا

لو ما كانش جنب مني

مين همومي هيقاسمني

مين بيفرح لما بفرح

مين بنظره يكون فاهمني

مين بيعرف لما بسرح

إيه ف بالي وإيه شاغلني

مين معاه حسيت كأني

غالي عنده زي نني

و إني هوَّ و هوَّ إني

من بداية الطفوله

لو يشوف حزن ف عيوني

ألقى إيده بِيحضنوني

و إن ف يوم الناس فاتوني

صوت شفايفه يِطمنوني

كلمتين بس يِقولولي

تاني أقدر أشد حيلي

هوَّ عرضي و هوَّ طولي

شمس صبحي و ضى ليلي

و إن تقل ع الكتف شيلي

بينّا نقسمها الحموله

أخ غالي و اللي بِينّا

حاجه معرفهاش غيرنّا

ويا بعض صحينا نمنّا

و ياما بكرة بيه حلمنّا

ويا بعض صغار كبرنا

و حكايتنا بطول سنينا

يوم فرحنا و يوم حزنّا

إنما و لا مره كنا

نفترق غير غصب عنا

و ف قلوبنا لينا صوره

هو ماضي و هو حاضر

لو سألت يقولِّي حاضر

أخ ف الزمن اللي داير

اللي فيه الأخ نادر

و بصراحه مهما أحاول

و إن فضلت لبكرة قايل

صعب خالص أبقى قادر

مهما أكتب فيه رسايل

إني أوصف إنه عادل

و إنه عنوان لِلرجوله

0
0
0
s2smodern