قصائد متنوعة - الأكثر قراءة

قرايب أبوكي

الزيارات: 1038
تعطيل النجومتعطيل النجومتعطيل النجومتعطيل النجومتعطيل النجوم
 

بصي هناك حواليكي

مين واقفين جنبيكي؟

إفتحي يعني عنيكي

ردي الله يخليكي

جاوبي عليّا أرجوكي

فيه زييهم ناس حبوكِي؟

مين قبليهم

بين رمش عيونهم حطوكِي

مين قديهم

خايف كدا م النسمه علِيكي

مش لما بتبقي ف وسطيهم

كلمة عيله بِتدفِيكي؟

مش أحياناً بتعديهم

متكفِيش صوابِعها إيديكي؟

مش أول ما تنادي عليهم

عشرين واحد جري يجِيكي

مش إحساسك و إنتِ ما بينهم

مش هتكوني ف يوم وحديكي

دولا يا بنتي ماحدِش غيرهم

من غدر الأيام يحميكي

دول غير ناس ماتت ضمايرهم

كانوا مني عايزين يخدوكي

دولا قلوبهم لسه بخيرهم

يبكوا معاكي لو بكوكي

و الأفراح للسما بِتشيلهم

لو فرحانه بجد شافوكي

دولا يا بنتي قرايب أبوكي

عارف أنا ف الأول صعبه

تبقي بعيده عليّا و غايبه

و ألقى مشاعري عليكي دايبه

يعني هحِس صحيح بالغربه

و أبدأ أحسب كل دقيقه

أيوه يوماتي ف بحر الوحده

الأحاسيس هلاقِيها غريقه

لكن شوفي

مهمَّن كانت صعبه ظروفي

مهما أشتاقت ليكي كفوفي

عمري علِيكِي ما أموت من خوفي

عارف إني ف يوم هلاقِيكِي

ربي هيجمع بيّا و بيكي

و أرجع ليكي

أحكِيلِك و أسمع حكاويكِي

و تنامي قصادي و أغطِيكي

و أما أناديكي

يوصلّك صوتي تجاوبيني

أصل أنا عارفك بِتحبِينِي

صعب علِيكي ف يوم تنسِيني

و أنا صعب الدنيا تنسِّيني

دا أنت سنيني

و مهمن كان إيه بِينك بيني ..هتحسِيني

طب ما أنا شايفك أهو و أديني

و كأنك جنبي سمعتيني

يالا سؤالي عليه جاوبيني

فيه زييهم ناس حبوكِي؟

مين قبليهم

بين رمش عيونهم حطوكِي

مين قديهم

خايف كدا م النسمه علِيكي

دولا يا بنتي قرايب أبوكي

0
0
0
s2smodern