قصائد متنوعة - الأكثر قراءة

عارف يا أمّه مقامك

الزيارات: 1620
تعطيل النجومتعطيل النجومتعطيل النجومتعطيل النجومتعطيل النجوم
 

هي قصيده شخصيه لإنها إلى أمي الحبيبه و لكن قد يكون هناك من يود أن يهديها مثلي إلى أمه تقديراً وعرفاناً

عارف يا أمّه مقامك

جنه تحت أقدامك

يعني مافيش و لا كلمه

توصف قيمته مكانك

بعد ما رب العزة ف القرآن قالهالك

و كلمة إيه ممكن أقولهالك

أنا إيه يا أمّه بدون الضمه

لما بتاخديِني ف دراعاتك

طب دا أنا لما أحس بضلمه

ألقى النور تاني بدعواتك

و بيك يا أمي عشانك

يرضى عليّا الله و يبارك

يجعل ضى ف ليلي الحالك

و طريق سد بِيصبح سالك

يا أمّه رسول الله أوصالك

أعظم شئ في الدنيا وصالك

كلمة إيه ممكن أقولهالك

بعد شهور تسعه ف أحشائك

موصول شرياني بشريانك

و سنين و إنت مافيش على بالك

غير إبنك يكبر قدامك

بس تحسي إن أنا محتاجك

من غير ما أندهلك ألقاكِ

يا أمّه كتيره عليّا جمايِلك

دا أنا غرقان ف بحور من فَضلك

يبقى إزاي لو قلت بحبِك

أبقى خلاص وفيتك حقِك

دا أنا أبوس راسك .. إيدك .. رجلك

كل الغالي يا أُمي أجيبلك

و تهون الدُنيادي لأجلك

وأفضل لسه كمان مديونلك

لو حتى عيوني إدتهالك

كلمة إيه ممكن أقُولهالك

أكبر مهما أكبر أنا إبنك

كنت جنين شيلتيني ف بطنك

طفل صغير حاطاني ف ننك

و كبير يا أمّه و لسه ف قلبك

كل محاول كلمه إكتبلك

ألاقيني بكرر ف كلامك

مانا علمني يا أُمي لسانك

و عرفت الدنيا بحكاياتك

ومشيت لما رأيت خطواتك

لسانِّي حاسه جميل إحساسك

لسه كأني ف توبك ماسك

أتعب .. تخديني ف أحضانك

أبرد .. ألقى الدفا ف حنانك

مهما أسأل .. يـِوصلني جوابك

يا أمّه كتير بكّاني بعادك

يا أمّه ياريت بإديّا وصالك

كنت بنيت ف جسور واصلالك

كنت أعوم ف بحور رايحالك

كنت أهد يا دُنيا جبالك

و أرجع تاني يا أُمي لدارك

أمسح دمع عيوني بشالك

كلمة إيه ممكن أقُولهالك

يا أمّه أنا عايزك

تِدعيلي تملي ف صلواتك

يا أمّه أحلفلك

كل منايا أنول مرضاتك

يا أمّه ف بالي تملي و شايفك

لما ضنايّا بشوفه قبالي

أيوه يا أُمي خلاص صدقتك

بعد ما رَبي عيال إدالي

يا أمّه خلاص و الله فهمتك

إنه صحيح الضنا شئ غالي

حاسس بيها يا أُمي مشاعرك

لما خلاص ما بقتش قبالك

يعني صغير كنت أنا شاغلك

و كبير برضه محير حالك

كلمة إيه ممكن أقُولهالك

و عارف يا أمّه مقامك

جنه تحت أقدامك

يعني مافيش و لا كلمه

توصف قيمته مكانك

بعد ما رب العزة ف القرآن قالهالك

شاهد تسجيل حي للقصيدة

0
0
0
s2smodern