قصائد متنوعة - الأكثر قراءة

وحشتيني يا سارة

الزيارات: 1399
تعطيل النجومتعطيل النجومتعطيل النجومتعطيل النجومتعطيل النجوم
 

على الرغم من علمي وقتها أنها تلقى أفضل رعايه وإهتمام في المستشفى التي مكثت فيه أسابيع طويله إلا أنني لم أستطع أن أخفي شوقي ولهفتي لوجودها بين أركان غرفتها أسأل الله العلى القدير أن يشفي كل مريض

بردان سريرك

مستني تيجي و تدفيه

و لا حد غيرك

هينام يا ساره فيه

وحشتيني يا بنت الإيه

مقدرش أقولك قد إيه

وحشتيني يا بنتي

و كلمة بابا وحشتني

أسمعها منك إنت

دا أنت من يوم ما غيبتي

في الحلق بحس مراره

مستني يقولوا رجعتي

يا قمره ف ليلي نواره

وحشتِيني كتيييييييير

كتير قوي

كتير خالص يا ساره

من شوقي ليكي

جبت ألبوم الصور

الله عليكي

دا أنت زي القمر

عمرك ف الصوره ديّا

كان ييجي يدوب شهرين

أو قولي بكتيره تلاته

كان بدري عليكي تجري

أو تمشي تاتا تاتا

و الصوره ديّا

كنت ف آخر سعاده

واقفه معايَّا و بتصلي

على آخر حرف السجاده

والصوره دهيّا فاكرها

كان أول يوم ف حضانه

كنت ساعتها بتحكيلي

و إنت كتير قوي فرحانه

و دي صوره لمحتك فيها

و عيونك كانت سرحانه

صعب علِيكي إن شفتيها

كدا زيي تكوني فاكراها

أما أنا منساش و لا ثانيه

ف الصوره دهيّا أو التانيه

و هـبقى أحكِيلك حكايتهم

لما هترجعي يا ضنايا

على جنب خلاص راح أشيلهم

تشوفيهم تاني معايَّا

كان لسه يوميها مافيش ف طريقنا جـروح

و آهو جانا الحزن يا بنتي لما لقاه الباب مفتوح

حاسس في غيابك هتجنن

و البيت ما بقاش فيه روح

لا أنا قادر أهدَى و لا أطمن

من ركن لركن أروح

الفرح خلاص ما بقاش ممكن

ف غيابك و لا مسموح

و لا قادر أبطل تفكير

ف طبيعة الدنيا الغداره

وحشتيني كتيييييييير

كتير قوي

كتير خالص يا ساره

الليل بِيمر عليّا ف بعدك زي سنين

على طول قدامي ملامحك

و كأنك مبعدتيش مترين

و كأنك جنبي و شايفك

و ببوسك ع الخدين

آجي أشبك كفي بكفك

تقوليلي يا بابا بعدين

و أنا أعمل نفسي مخاصمك

و أمثل أني حزين

و مع أول بوسه أسامحك

و آخدك نركب مراجيح

أصل إنت شقيه أنا عارفك

بس شقاوتك حاجه جميله صحيح

ما بتوصفهاش عبارة

وحشتيني كتيييييييير

كتير قوي

كتير خالص يا ساره

وحشني يا بنتي صوتك

و نفسي أسمعه

دي اللحظه اللي ف وجودك

بتساوي عمري أجمعُه

و أنا ناوي يوم رجوعك

كل اللي فاتني أرجعه

عن كل ليله غِبتِي فيها

ألف بوسه و ألف حضن

ما أنا كنت لوحدي بقضيها

و إشتاقلك قَوي و أحن

بكره يا بنتي هتحسيها

لما يكون عندك إبن

و دموع العين تلاقيها

على خدك نازله تئن

و تقاسي م الضنا

لو غاب عنك ضنا

و تكوني زيي أنا

على طول مشغوله و محتاره

وحشتيني كتيييييييير

كتير قوي

كتير خالص يا ساره

0
0
0
s2smodern