الجوكر هو أحد هؤلاء الذين إستباحوا جهد الآخرين على الإنترنت ولم يصل إليهم بعد إن الإستيلاء على الإبداع الفكري هو أمر مذموم ويتعارض مع الشرائع والأخلاق والمبادئ ويكفي أنه يعتبر سرقه وقد قام الجوكر بنقل قصيده لشاعر صديق ووقع نيابة عنه وأخذ يتبادل الرأي مع الآخرين حولها بإعتباره هو من كتبها فكان لابد لي أن أقول رأيي
لو كان بإديَّا الأَمر يا جوكر
أنا كنت أحطك في التخشيبة
و أقفلها بقفل مصدي مسوجر
علشان تتعلم
إن السِرقه حرام
و الكـدب مالوش رجلين
و إن مرة نقلت كلام
تكتب جنبه بِتاع مـِيـن
مش عامل فيها أديب
وإنت مقامك حرفين
تكتبهم بالتقريب
بمساعدة ناس تانيِين
و اللي يدور يلاقيك
محتاج حد يربيك
تستاهل لو زفوك
ف الإنترنت و خلوك
عبره لغيرك و مثال
يضربوا بيك الأمثال
و يقولوا عليك محتال
ف شريط الخبر الدايِّر
إزاي بقى إسمك شاعر
و إنت معندكش مشاعر
و لا تفهم ف الأحاسيس
روح رَوَّح يالا يا شاطر
إسلوبك واطي رخيص
روح يالا و شوفلك ساتر
ما خلاص مبقتش عريس
روح يالا أحسنلك ذاكر
و إفتح تاني الكراريس
روح يالا و تم علامك
شوف حاجه تليق بِمقامك
مش جاي تقول دا كلامك
و إنت مروحتِش كتاتيب
قول جوكر في اليانصيب
أو فوق ترابيزِة بوكر
مش جاي تقولي أديب
و إن إنت الشاعر سوبر
و الله دي حاجه عجيبه
لو كان بإديَّا الأَمر يا جوكر
أنا كنت أحطك في التخشِيبة
و أقفلها بقفل مصدي مسوجر
